पोखरा, १० चैत । खाद्य व्यवस्था तथा व्यापार कम्पनी लिमिटेड गण्डकी प्रदेश कार्यालय पोखराले बिक्री केन्द्र विस्तार गरेको छ । नेपाल सरकारको स्वामित्वमा रहेको यो कार्यालयले यही चैत ८ गतेदेखि पोखराको पृथ्वीचोकमा पनि आफ्नो बिक्री केन्द्र स्थापना गरेको हो ।

प्रादेशिक कार्यालय रहेको पोखरा बिरौटाबाट सर्वसाधरणलाई सुलभ दरमा गुणस्तरीय चामल बिक्री गर्दै आएको लिमिटेडले पृथ्वीचोकस्थित साविक नेसनल ट्रेडिङ लिमिटेडको कम्पाउन्डभित्र रहेको नेपाल खाद्य बिक्री कक्षाबाट नयाँ बिक्री थालनी गरेको निमित्त प्रादेशिक प्रमुख नवीन बस्नेतले जानकारी दिए ।

बजार मूल्य नियन्त्रणमा भूमिका खेल्ने गरी सर्वसाधरणलाई सुपथ र सहुलियत मूल्यमा चामल बिक्रीको थालनी गरिएको जानकारी दिँदै उनले नेपाल सरकारले दिएको सहुलियत सेवाको फाइदा उठाउन आग्रह गरे ।

प्रादेशिक कार्यालयका सूचना अधिकारी रञ्जना केसीका अनुसार स्टिम जिरा चामल प्रति २५ किलोग्राम बोराको १ हजार ७ सय ५० रुपैयाँ र अरुवा सोना मन्सुली चामल प्रति ३० किलोग्राम बोराको १ हजार ५ सय ३९ रुपैयाँमा उपभोक्ताले केन्द्रबाट खरिद गर्न सक्छन् ।