पोखरा । गण्डकी प्रदेश सरकारको सत्ताघटक नेकपा (माओवादी केन्द्र) सरकारबाट बाहिरिने औपचारिक निर्णय गरेको छ । शुक्रबार दिउँसो पार्टीको संसदीय दलको बैठकले सरकारबाट बाहिरिने निर्णय गरेको हो । साथै पार्टीबाट २ जना मन्त्रीहरुले पनि शुक्रबार नै मुख्यमन्त्री समक्ष राजीनामा बुझाउने तयारी छ ।

राष्ट्रपति निर्वाचनमा पार्टीले गठबन्धन तोडेर कांग्रेस लगायतका दलसँग गठबन्धन कायम गरेपछि राजनीतिक क्षेत्रमा नयाँ तरंग उत्पन्न भएको हो । त्यसको बाछिटा गण्डकी प्रदेशमा पनि परेको हो ।

पार्टी अध्यक्ष पुष्पकमल दाहाल प्रचण्डले गण्डकी प्रदेश सरकारबाट आफ्ना मन्त्रीलाई फिर्ता बोलाउने निर्देशन दिएसँगै एमाले सरकार अल्पमतमा परेको हो । गण्डकीमा एमालेले सरकारको नेतृत्व गरेको छ । मुख्यमन्त्री खगराज अधिकारीलाई माओवादीबाट मन्त्री बनेकाहरु भौतिक पूर्वाधार मन्त्री हरिबहादुर चुमान र उद्योग, पर्यटन वन तथा वातावरण मन्त्री रेशमबहादुर जुग्जालीले राजीनामा दिन लागेका छन्।