पोखरा । फुटबलका पूर्व राष्ट्रिय खेलाडी डम्बरसिंह गुरुङको निधन भएको छ । पोखरा ३, नदीपुर निवासी गुरुङको ७१ वर्षको उमेरमा बुधबार मणिपाल शिक्षण अस्पतालमा निधन भएको हो । पछिल्लो समय उच्च रक्तचापबाट पीडित उनलाई मुटुमा समस्या देखिएपछि अस्पताल भर्ना गरिएको थियो ।

बेलायती सेनामा कार्यरत रहँदा उनी नेपाली राष्ट्रिय टिमबाट ओलम्पिक क्वालिफायर राउन्डमा कुवेतविरुद्ध फुटबल खेलेका थिए । फुटबलमा उत्कृष्ट प्रदर्शन देखेरै राखेपका तत्कालीन सदस्यसचिव शरदचन्द्र शाहले सन् १९७४ मा उनलाई नेपाली राष्ट्रिय फुटबल टिममा अनुबद्ध गराएका थिए । सन् १९८२ को एसियन गेम्समा समेत नेपालको प्रतिनिधित्व गरेका गुरुङ आरसिटी क्लबमा पनि आवद्ध थिए । सन् १९८२ मा उनी आबद्ध आरसिटी क्लब राष्ट्रिय लिगमा लिग च्याम्पियन समेत बनेको थियो । उनी एएफसीको आधिकारिक प्रतियोगिता यु–१६ एसियन युथमा समेत नेपाली राष्ट्रिय टिमको सदस्य थिए ।

उनी सन् १९७४ मा यु–१९ को टिमबाट फुटबल खेलेका थिए । ब्रिटिस आर्मीबाट सेवा निवृत्तपछि सन् १९६६ मा नेपालको यु–१४ र यु–१६ को प्रशिक्षक बनेका थिए । यस्तै, एपिएफ र त्रिभुवन आर्मी क्लबको प्रशिक्षकको भूमिका निर्वाह गरेका थिए ।

पछिल्लो समय ‘डम्बरगुरु’ उपनामबाट परिचित उनी खेलकुदसँगै सामाजिक अभियानमा पनि उत्तिकै सक्रिय थिए । केटाकेटीलाई उनी असाध्यै माया गर्थे । केटाकेटी पनि उनी भनेपछि हुरुक्क हुन्थे । ३ वर्ष पहिले उनलाई मस्तिष्कघात भएपछि टाउकोको शल्यक्रिया गरिएको थियो । उनी पोखरामै आराम गरिरहेका थिए ।

बेलायती सेनाबाट सेवानिवृत्तपछि उनले सहारा एकेडेमीमा आश्रित बालकहरुलाई सुरुआतका ६ वर्षसम्म निशुल्क फुटबल सिकाएका थिए । उनको निधनले पोखराको खेलजगत्मा अपुरणीय क्षति पुगेको भन्दै सहारा क्लब पोखरातर्फबाट महासचिव रामजीप्रसाद अधिकारीले शोकविज्ञप्ति जारी गर्दै दुख व्यक्त गरेका छन् ।

स्व. गुरुङका श्रीमती, १ छोरा र ३ छोरी छन् । उनका छोरा विदेशबाट फर्केपछि शनिबार मात्र अन्त्येष्टि गरिने परिवारजनले जनाएको छ ।