पोखरा । प्रधानमन्त्री पुष्पकमल दाहाल प्रचण्डले संसदबाट विश्वासको मत प्राप्त गरेका छन् । सोमबार उनले प्रतिनिधिसभाको विश्वास छ भनी राखेको प्रस्तावको पक्षमा १ सय ७२ सांसदले उनको पक्षमा मत दिएका हुन् ।

संसदमा २ सय ६२ सांसद उपस्थित रहेकामा विश्वासको मतको प्रस्तावको विपक्षमा ८९ सांसदले मत परेको छ । १ जना तटस्थ बसे ।

सोमबार प्रतिनिधिसभामा प्रधानमन्त्रीलाई नेपाली कांग्रेस, नेकपा माओवादी केन्द्र, जनता समाजवादी पार्टी नेकपा एकीकृत समाजवादी, जनमत पार्टी, लोकतान्त्रिक समाजवादी पार्टी, नागरिक उन्मुक्ति पार्टी, राष्ट्रिय जनमोर्चाका सांसद र स्वतन्त्र सांसदहरु प्रभु साह, अमरेशकुमार सिंहलगायतले विश्वासको मत दिए । नेकपा एमाले, राप्रपा र नेपाल मजदुर किसान पार्टीका सांसदले प्रधानमन्त्रीको विश्वासको मतको विपक्षमा मतदान गरे ।

यसअघि, १० पुसमा नेकपा एमाले सहितका दलको समर्थनमा उनी प्रधानमन्त्री बनेपछि २६ पुसमा विश्वासको मत लिएका थिए । त्यसबेला संसदको ९९ दशमलब २६ प्रतिशत मत प्राप्त गरेका थिए ।

प्रचण्डले राष्ट्रपति निर्वाचनमा नेपाली कांग्रेससँग गठबन्धन गरेपछि एमाले र राप्रपाले समर्थन फिर्ता लिएका थिए । राष्ट्रपति चुनावको समयमा समीकरण फेरिँदा साढे २ महिनाभित्रै उनले पुनः विश्वासको मत परीक्षण गरेका हुन् ।