पोखरा । जिल्ला समन्वय समिति महासंघको चौथो राष्ट्रिय परिषद बैठकबाट निर्वाचित गण्डकीका पदाधिकारी तथा सदस्यको सपथ ग्रहण आइतबार भएको छ । गण्डकी प्रदेश समितिका अध्यक्ष लीलाधर पौडेलले निर्वाचित पदाधिकारी र सदस्यहरूलाई सपथ खुवाएका हुन् ।

कार्यक्रममा अध्यक्ष पौडेलले गण्डकी प्रदेशका जिल्ला समन्वय समिति सक्रियताका साथ संविधानले तोकेको अधिकार प्रयोग गर्दै गुणस्तरीय परिणाम निस्कने गरी काममा उत्रन आग्रह गरे ।

विकासका काममा लापरबाही र ढिलासुस्ती विकाराल देखिएको भन्दै सबै तहका सरकारको समन्वयमा खडा भएको जिसस विशेष चनाखो हुनुपर्ने उनको भनाइ थियो ।
कार्यक्रममा जिसस महासंघका केन्द्रीय सदस्य बाबुराम विक, कास्कीका जिल्ला समन्वय अधिकारी नवराज बराललगायतले बोलेका थिए ।

अध्यक्ष लीलाधर पौडेलको सभापतित्वमा  भएको कार्यक्रममा स्वागत उपाध्यक्ष सोमबहादुर जिसी र सञ्चालन सचिव सरस्वती बगालेले गरेका थिए ।