पोखरा । कास्कीको ताङतिङमा अवस्थित नौंचु पैंगी लामा महायान बौद्ध गुम्बाको गण्डकीका प्रदेश प्रमुख पृथ्वीमान गुरुङले उद्घाटन गरे । प्रदेश प्रमुख गुरुङले भाषा, संस्कार र संस्कृतिको जगेर्नामा अरु गुरुङ गाउँभन्दा ताङतिङ अगाडि रहेको कुरा बताए । ‘पञ्चायत कालमा धार्मिक स्वतन्त्रता थिएन । तर मुलुकमा व्यवस्था परिवर्तन भएपछि सबै जातजातिले आफ्नो भाषा, संस्कार र संस्कृतिको विकास गर्न पाएको छ,’ उनले भने, ‘फलस्वरूप अहिले जुन सुकै गुरुङ गाउँ जानु त्यहाँ अत्याधुनिक गुम्बा निर्माण भएको छ ।’

उनले बुद्धको पूजा गर्दैमा बौद्ध धर्मावलम्बी नहुने र असली बौद्ध धर्मावलम्बी हुन बुद्धको पञ्चशीललाई आफ्नो जीवनमा लागु गर्नुपर्ने बताए ।

कार्यक्रममा मादीका अध्यक्ष देवीजंग गुरुङ, उपप्रमुख कल्पना गुरुङ लगायत उपस्थित थिए । कार्यक्रममा गुम्बा निर्माण व्यवस्थापन समितिका कार्यवाहक अध्यक्ष बिर्जमान गुरुङले गुम्बाको निर्माण कार्यमा सहभागीलाई धन्यावाद ज्ञापन गरे ।