पोखरा । नौलो घुम्ती नेपालद्वारा कास्की जिल्ला, जिल्ला प्रशासन कार्यालय कास्कीको परिसरमा रहेको प्रतीक्षालय पुनर्निर्माण गरी हस्तान्तरण गरेको छ ।

कार्यक्रममा संस्थाका पूर्वअध्यक्ष तथा सल्लाहकार खड्गबहादुर रानाभाटले प्रतिक्षालय पुनर्निर्माण भएसँगै जिल्ला प्रशासन कार्यालयमा आउने सेवाग्राहीलाई सहज हुनुका साथै थप व्यवस्थित हुने बताए ।

संस्थाका अध्यक्ष बद्रीविनोद खनालले जिल्ला प्रशासन कार्यालय कास्कीसँगको सहकार्यमा प्रतीक्षालय पुनर्निर्माण गर्न पाउँदा संस्थाले गर्व महसुस गर्नुका साथै समाजिक उत्तरदायित्व निर्वाह गरेको महसुस भएको बताए ।

उक्त अवसरमा प्रमुख जिल्ला अधिकारी टेकबहादुर केसीले नौलो घुम्ती नेपालले विभिन्न जिल्लामा लागुपदार्थ परामर्श उपचार तथा पुनस्र्थापना तथा सामाजिक विकासका विभिन्न क्षेत्रमा उल्लेखनीय कार्य गरेको र आगामी दिनहरूमा पनि संस्थाले यसरी नै काम गरोस् भन्ने शुभकामना व्यक्त गरे ।

कार्यक्रममा पूर्व अध्यक्ष तथा सल्लाहकार पदमराज पहारी, संस्थाका वरिष्ठ उपाध्यक्ष सुरेन्द्र थापामगर, कोषाध्यक्ष महेन्द्रकुमार गुरुङ, सदस्य ढुण्डिराज ज्ञवाली, कार्यकारी निर्देशक अनेश गुरुङ लगायतको उपस्थिति थियोे । कार्यक्रम सहायक प्रमुख जिल्ला अधिकारी गुरुदत्त ढकालले सञ्चालन गरेका थिए ।