पोखरा । नयाँ–नयाँ पहिरनमा सजिएका मोडल र्‍याम्प उत्रिएका छन् । असाप इन्टरटेन्मेन्टले आयोजना गरेको तेस्रो हेरिटेज अफ फेसन नेपालमा ख्याति कमाएका डिजाइनरले तयार पारेका पहिरनमा उनीहरु र्‍याम्प उत्रिएका हुन् ।

लेकसाइडस्थित हेरिटेज होटलमा भएको फेसन सोमा नेपालका विभिन्न जातजातिका पुख्र्यौली पहिरनदेखि सांस्कृतिक सम्पदा झल्काउने पहिरन फेसनमा प्रदर्शन गरिएको थियो ।

गण्डकी प्रदेश सरकारका मुख्यमन्त्री खगराज अधिकारीले फेसन सो उद्घाटन गर्दै नेपालको सांस्कृतिक प्रचारप्रसारमा कार्यक्रममार्फत टेवा पुग्ने बताए । उनले यस्ता कार्यक्रममार्फत अहिलेका युवालाई नेपालको सभ्यता र सम्पदाका विषयमा समेत जानकारी मिल्ने बताए । प्रदेश सरकार पनि प्रदेशको सांस्कृतिक सम्पदाको संरक्षणमा लागि परेको भन्दै उनले सो कार्यक्रम निरन्तरताको कामना समेत गरे ।

सो स्टपरमा पोखराका व्यवसायी एवं चलचित्रकर्मी सन्तोष अधिकारी र्‍याम्पमा देखिए । उनले नेपालको संस्कृति झल्काउने पहिरन लगाएका थिए । चलचित्र ‘आमा’ को सहनिर्माता अधिकारीले नै हेरिटेज अफ फेसन नेपालको अवधारणा ल्याएका हुन् । अधिकारीसँगै सुनिशा बजगाई, एन्जल श्रेष्ठ, स्वीन्जा सुमन, दीपा मगर स्टेजमा देखिए ।

डिजाइन तिर्सना गुरुङ, रोविन परियार, अमितेस कर्ण, मनिस बोगटी, आयुश ठकुरी, सजिना विष्ट, ज्वाला राज पोखरेलको डिजाइन प्रस्तुत गरिएको थियो । कलाकार अर्पण थापाको विशेष उपस्थिति थियो भने चलचित्र निर्माता शर्मिला पाण्डे, निर्देशक घनश्याम लामिछाने, नेपाल एयरलायन्सकी क्याप्टेन भावना पन्त, सुरज पाण्डे, संचारकर्मी जीपी तिमिल्सिना, विवेकसिंह ठकुरीको उपस्थिति थियो । नवराज श्रेष्ठको सांगीतिक प्रस्तुति रहेको सोको विवेक खतिवडाले संचालन गरेका थिए ।