पोखरा । पोखरा महानगरपालिका १३ ले ७१ जना युवालाई निशुल्क बारिस्ता तालिम दिएको छ । वडा कार्यालयको आर्थिक सहयोगमा १ महिनासम्म चलेको तालिम बुधबार समापन भएको हो ।

तालिममा एभरेस्ट इन्स्टिच्युट अफ होटल म्यानेजमेन्ट प्रालिले प्राविधिक सहयोग गरेको थियो । सबै प्रशिक्षार्थीलाई निशुल्क तालिम प्रदान गरिएको वडाध्यक्ष किरण बरालले जानकारी दिए । उनकाअनुसार तालिममा ४१ पुरुष र ३० महिला सहभागी थिए ।

तालिमपश्चात बुधबार नै तालिमका सहभागीलाई प्रमाणपत्र दिइएको थियो । ‘तालिमले स्थानीय युवायुवतीलाई सिप सिकेर आत्मनिर्भर बनाई थप जीवनयापन गर्न सहज विश्वास गरेका छौ,’ उनले भने,’ सिप सिकौं र आत्मनिर्भर बनौं भन्ने अभियानका साथ तालिम आयोजना गरिएको थियो ।’ आगामी दिनमा आत्मनिर्भर हुन सघाउने थप कार्यक्रम ल्याई स्थानीयलाई जीविकोपार्जनका लागि थप सहज बनाइने उनले प्रष्ट पारे ।

तालिममा सहभागी सबैलाई महानगरका शिक्षा प्रमुख हेमप्रसाद आचार्यले प्रमाणपत्र वितरण गरेका थिए । उनले वडाले यस्ता प्रोत्साहनमूलक कार्यहरू गर्नलाई सुझाए । ‘युवाहरूमा गरेको लगानी खेर जाँदैन । लगानीलाई थप फलदायी बनाउन सबैजनाको सक्रियताको आवश्यक रहेको छ,’ प्रमुख अतिथि आचार्यले भने ।