पोखरा । गोरखामा मिनी ट्रक दुर्घटना हुँदा २ जनाको मृत्यु भएको छ । सोमबार दिउँसो सदरमुकामस्थित बिसौनी मोडबाट प्रदेश ३–०१–००३ क ६१७० नम्बरको ट्रक पल्टिएर जिल्ला प्रहरी कार्यालयको भवन नजिक पुगेको थियो । दुर्घटनामा ट्रकधनी आरुघाटका उमेश श्रेष्ठ र राष्ट्रिय वाणिज्य बैंक गजुरीमा कार्यरत विष्णु खड्काको मृत्यु भएको हो ।

उनीहरु दुवैजना दुर्घटनामा गम्भीर घाइते भएका थिए । श्रेष्ठको गोरखा अस्पताल र खड्काको चितवन मेडिकल कलेज भरतपुरमा मृत्यु भएको गोरखा प्रहरीका प्रवक्ता डिएसपी लीलाराज लामिछानेले जानकारी दिए । उनका अनुसार दुर्घटनामा घाइते भएकामध्ये ५ जनाको भरतपुर र एकजनाको गोरखा अस्पतालमा उपचार भइरहेको छ ।

बर्दियाका मंगल चौधरी गम्भीर घाइते छन् । उनी विवाहमा सहभागी हुन गोरखा गएका थिए । उनी पनि वाणिज्य बैंक गजुरीमा कार्यरत हुन् । चितवनबाट फलफूल लिएर आरुघाट जाँदै गरेको ट्रक सामान लोड गर्न शक्तिचोक गएको थियो । सामान लोड गरेर निस्किने वित्तिकै दुर्घटनामा परेको हो । ट्रक अनियन्त्रित भएपछि बा८६प १७८५ नं को मोटरसाइकल र सडक पेटीमा बसेर चनाचटपट खाइरहेका व्यक्तिहरुलाई ठक्कर दिएको थियो ।