पोखरा। पोखरा अन्तर्राष्ट्रिय विमानस्थलले रात्रिकालिन उडासँगै भद्रपुर उडान सुरुवात गरेको छ । बिहीबार राति नै झापाको भद्रपुरबाट बुद्धको जहाज पोखरा आएको थियो ।
जनवरी १ बाट पोखरा अन्तर्राष्ट्रिय विमानस्थलमा बुद्ध, यती, श्री, सौर्य, गुण लगायतका वायुसेवाले आन्तरिक उडान गर्दै आएका थिए । यसअघि पोखरामा रात्रिकालीन उडानको सुविधा थिएन । बुधबार राती उडान भएसँगै आन्तरिक उडान तर्फ बिहानदेखि सुरु भएपनि दिउँसो ४ बजे विमानस्थल बन्द अवस्थाको रात्रिकालीन उडानसँग अन्त्य भएको विमानस्थलका प्रमुख विक्रम गौतमले बताए ।

वुद्ध एयरले पोखरा अन्तर्राष्ट्रिय विमानस्थलमा देशका विभिन्न चार गन्तव्यबाट बिहीबार ९ मार्चदेखि रात्रिकालीन उडान सुरु गरेको हो । काठमाडौं, भद्रपुर, भैरहवा तथा नेपालगञ्जबाट रात्रिकालिन उडान भइहेको वुद्ध एयरका प्रवक्ता दीपेन्द्र कणले बताए । वुद्ध एयरसँगै यसअघि शौर्य एयरलायन्सले रात्रिकालीन उडान गरेको थियो । एयरलायन्सका एटीआर–७२ जहाज तथा एटीआर–४२ जहाजबाट उडान हुनेछ । ‘रात्रीकालिन उडानको समय काठमाडौं–पोखरा १९ः३५ बजे, पोखरा–काठमाडौं १७ः३० भद्रपुर–पोखरा १८ः५५ नेपालगञ्ज–पोखरा १९ः३० भैरहवा–पोखरा १९ः२५ सुरु भएको हो । यी चारै गन्तव्यका जहाजहरु रात्री विसान पोखरामै हुन्छ । भोलिपल्ट विहानै ती जहाजहरुबाट पुनः काठमाडौं, भैरहवा, नेपालगञ्ज तथा भद्रपुरको उडान भर्नेछन्,’ कर्णले भने ।

शुक्रबार बिहान मात्र पोखरादेखि भद्रपुरसम्म निजी क्षेत्रको बुद्ध एयरले सीधा हवाई उडान सुरु गरेको छ । ‘बिहीबार बेलुका नै वुद्ध एयरलायन्सको विमान भद्रपुरबाट पोखरा अवतरण गरेको थियो । शुक्रबार उक्त विमानले पोखरादेखि भद्रपुरसम्मको उडान सफलताका साथ अवतरण गरेको छ,’ प्रमुख गौतमले भने । एयरलायन्सले पोखरा भद्रपुर उडान गर्न शुक्रबार पोखरा महानगरपालिकाका मेयर धनराज आचार्य, पर्यटन व्यवसायी र पत्रकारहरुको टोलीलाई लिएर पुगेको थियो ।