लमजुङ । बेंसीसहर नगरपालिकाद्वारा संचालित पाँचौं नगरपालिकास्तरीय राष्ट्रपति रनिङ सिल्ड प्रतियोगितामा वडा ११ चितीस्थित जनकल्याण मावि च्याम्पियन भएको छ । ९ स्वर्ण, ६ रजतसहित समग्रमा जनकल्याण च्याम्पियन हुन सफल भएको हो ।

त्यस्तै, ८ स्वर्ण र ७ रजतसहित जनविकास मावि दोस्रो भयो । ५ स्वर्ण र ६ रजतसहित जनकल्याण मावि बेंसीसहर–१ उदीपुर तेस्रो भएको आयोजक नगरपालिकाको शिक्षा शाखाले जनाएको छ ।
भलिबलतर्फ छात्रछात्रा दुवैतर्फको खेल बेसीसहरस्थित जनविकास मावि पहिलो भएको थियो ।

छात्रतर्फ जनकल्याण मावि चिती दोस्रो र छात्रातर्फ भूपू सैनिक बोर्डिङ स्कुल बेंसीसहर दोस्रो भयो । नगरपालिकाका शिक्षा शाखा प्रमुख उपसचिव किसानराज चिलुवालका अनुसार नगरस्तरीय प्रतियोगितामा प्रथम र द्वितीय हुन सफल खेलाडीलाई जिल्लास्तरीय राष्ट्रपति रनिङ शिल्ड प्रतियोगितामा सहभागी गराइने छ । प्रतियोगीतामा ३५ विधाका खेलमा २२ विद्यालय सहभागी थिए ।

कराते, भलिबल, ज्याब्लीङथ्रो, सटफुट, हाइजम्प, लङजम्प लगायत १७ विधाको खेलमा प्रतिस्पर्धा गराएको थियो । प्रतियोगितामा विजयीलाई बेंसीसहर नगरपालिकाका शिक्षा शाखा प्रमुख किसानराज चिलुवालले पुरस्कार वितरण गरेका हुन् ।

जनविकास मावि बेंसीसहरका जीतबहादुर कोइरालाको अध्यक्षतामा भएको समापन कार्यक्रमको सञ्चालन खेल शिक्षक राजु राउतले गरेका थिए । उनका अनुसार प्रतियोगितामा भाग लिएकामध्ये ८ विद्यालयले एउटै पनि पदक जित्न सकेनन् । ३ दिनसम्म चलेको प्रतियोगिताको उद्घाटन नगर प्रमुख गुमानसिंह अर्यालले गरेका थिए ।