स्याङ्जा । पुतलीबजार नगरस्तरीय राष्ट्रपति कप त्रिभुवन आदर्श नमुना माध्यमिक विद्यालयले हात पारेको छ । उपाधिसँगै विद्यालयले रनिङ सिल्डसहित विभिन्न प्रतिस्पर्धाका पदक प्राप्त गरेको छ ।

पुतलीबजार नगरपालिका १ स्थित मालेबगर खेलमैदानमा यही माघ २५ गतेदेखि पाँचौ राष्ट्रपति रनिङ सिल्ड प्रतियोगिता सुरु भएको थियो । प्रतियोगितामा सदरमुकाम अर्थात् पुतलीबजार नगरपालिका १ स्थित त्रिभुवन आदर्श माविले २६ अंकसहित प्रथम भएको छ भने २५ अंकसहित ज्योति आवासीय मावि द्वित्तीय भएको छ ।

यसैगरी, पुतलीबजार नगरपालिका ६ स्थित हिमालयन मावि टक्सार २३ अंकसहित तृतीय भएको छ भने पुतलीबजार २ स्थित रोशनी आवासीय मावि १९ अंकसहित सान्त्वना भएको खेल प्रतियोगिता सञ्चालन समितिका संयोजक बाबुराम बरालले जानकारी दिए ।

विजयी विद्यार्थीलाई नगरप्रमुख तुलसीराम रेग्मीले सिल्ड, ट्रफी, प्रमाणपत्र प्रदान गर्दै अध्ययनसँगै खेलकुद पनि नियमित गर्नुपर्नेमा जोड दिए । आगामी दिनमा समायानुकुलन खेल प्रतियोगिता र आवश्यकता अनुरुपका खेलमैदानको पूर्वाधार विकास गर्ने उनले बताए ।

नगर भित्रका ३६ वटा बिद्यालय सहभागी रहेको प्रतियोगितामा बिभिन्न १५ बिधाका प्रतियोगि खेलमा छात्र छात्राले प्रतिस्पर्धा गरेको खेल समितिका सदस्य रामकाजी थापाले बताए।