पोखरा । हिमालय आँखा अस्पतालमा स्वास्थ्य सामग्री खरिदका लागि जापाने सहयोग गर्ने भएको छ । स्वास्थ्य सामग्री सहयोगबारे सम्झौतामा मंगलबार अस्पताल प्रशासन र जापानी राजदूतबीच काठमाडौंमा सम्झौता भएको छ ।

जापानी दूतावास काठमाडौंमा आयोजित समारोहमा नेपालका लागि जापानी राजदूत किकुता युताका र अस्पतालकी निर्देशक डा. एलिया श्रेष्ठले सम्झौतामा हस्ताक्षर गरेका छन् । निर्देशक श्रेष्ठले ग्रामीण भेगमा हुने आँखा शिविरका लागि आश्यक उपकरण खरिदमा रकम खर्च गरिने जानकारी गराइन् ।

स्वास्थ्य सामग्र खरिदका लागि जापानले ६० हजार २ सय ८९ अमेरिकी डलर अर्थात् करिब ७६ लाख नेपाली रुपैयाँ प्रदान गर्नेछ । यो रकम जापानको समुदायको सुरक्षाको लागि अनुदान सहायता परियोजनाअन्तर्गतको हो ।

आई केयर फाउन्डेसन नेदरल्यान्डको अग्रसरतामा नेपाल नेत्रज्योति संघसँग मिलेर गण्डकी, धौलागिरी र कर्णाली अञ्चललाई लक्ष्य गरी विसं २०४९ मा पोखरामा हिमालय आँखा अस्पताल खुलेको हो ।

पहाडी क्षेत्रमा राजधानीबाहिर पोखरामा हिमालय आँखा अस्पताल र पाल्पामा लायन्स लाकौल गरी २ मात्र अस्पताल छन् । बेलाबखत बस्ने आँखा शिविर र मुलुकका २९ ठाउँमा सञ्चालित आँखाको प्रारम्भिक उपचार हुने स्वास्थ्य केन्द्रले सक्दो सेवा दिँदै आएका छन् ।

अस्पतालले वार्षिक ५ हजार ५ सय भन्दा बढीको आँखासम्बन्धी शल्यक्रिया गर्दै आएको छ । अस्पतालले गण्डकी र कर्णाली प्रदेशमा हरेक वर्ष २० देखि ३० वटा निशुल्क आँखा शल्यक्रिया शिविर पनि आयोजना गर्दै आएको छ । हाल पोखरा विश्वविद्यालयबाट सम्बन्धन लिएर जनशक्ति उत्पादनका लागि स्नातक र स्नातकोत्तर तहको पढाइ पनि सुरु गरेको छ ।