मातृभूमि सहकारीको सहयोग

आदर्श समाज सम्वाददाता
माघ २४, २०७९
Matribhumi AGM

पोखरा । पोखरा ८ स्थित मातृभूमि बचत तथा ऋण सहकारीले १३ औं स्थापना दिवसको अवसरमा विद्यार्थीलाई पोसाक तथा शैक्षिक सामग्री वितरण गरेको छ । तनहुँको भीमाद नगरपालिका २, बिरुवाको सिद्ध प्राथमिक विद्यालयमा अध्ययनरत ३० जना विद्यार्थीलाई पोसाक, शैक्षिक सामग्री र खेलकुद सामग्री वितरण गरिएको हो ।

कार्यक्रममा वडाध्यक्ष दिनेशकुमार थापाले विद्यालयको भौतिक तथा शैक्षिक अवस्था कमजोर रहेको अवस्थामा अध्ययनरत विद्यार्थीको हौसला बढाउने गरी सहकारीले गरेको अनुकरणीय काम गरेको बताए ।

उनले गाउँमा विकासको स्तरोन्नति हुँदै गइरहेको अवस्थामा पनि स्थानीय सहरमुखी हुनु तथा सम्बन्धित निकायबाट भइरहेका परिवर्तनमुखी र उत्पादनमुखी कार्यक्रमलाई पनि स्थानीयले चासो नदिनु दुखद् रहेको बताए ।

संस्थाका सल्लाहकार ईश्वरप्रसाद सुवेदीले तनहुँ सम्पर्क समाज पोखराका सदस्यद्वारा स्थापित सहकारी तनहुँकै भूगोल अथवा माृतभूमिमै आएर सामाजिक उत्तरदायित्वअन्तर्गत सहयोगको भूमिकाबाट साक्षात्कार गर्न पाउनु नै गर्वको कुरा भएको बताए ।

किहुँ अरुणोदय मिलन समाज पोखराका अध्यक्ष कृष्णप्रसाद सिग्देलले सहरमा एकीकृत भई आफ्नो जन्मभूमिको उत्थान र संस्कृतिलाई बचाउन समाज सक्रिय रहने बताए ।

संस्थाका अध्यक्ष हरिप्रसाद खनालले संस्थाले आफ्नो स्थापना दिवसको अवसर होस् वा अन्य कुनै समयमा गरिने सामाजिक उत्तरदायित्वका कार्य निरन्तर रहने बताए । कार्यक्रममा विद्यालय व्यवस्थापन समिति अध्यक्ष रामबहादुर थापा र प्रधानाध्यापक देवका सुवेदीलगायतले बोलेका थिए । कार्यक्रममा उपाध्यक्ष शिवराज पौडेलले स्वागत र सचिव बलराम गिरीले सञ्चालन गरेका थिए ।

Related News

सम्बन्धित समाचार

hero news full width