पोखरा । नेपालको तेस्रो अन्तर्राष्ट्रिय विमानस्थल पोखरामा भन्सार विन्दु तोकिएको छ । अर्थ मन्त्रालयले राजपत्रमा सूचना प्रकाशित गर्दै पोखरा अन्तर्राष्ट्रिय विमानस्थलमा भन्सार क्षेत्र तोकेको हो ।

राजपत्रमा प्रकाशित सूचनाअनुसार पोखरा १४ मा पोखरा अन्तर्राष्ट्रिय विमानस्थलले ओगटेको सबै क्षेत्र र ४ किल्लाभित्रको क्षेत्रलाई पोखरा अन्तर्राष्ट्रिय विमानस्थल भन्सार क्षेत्र घोषणा गरिएको हो ।

सूचनाअनुसार पूर्वमा विजयपुर खोला र सो खोलामा अवस्थित विजयपुर प्रथम जलविद्युत् आयोजनासँग जोडिएको क्षेत्रले भन्सार सिमाना छुट्याएको छ । पश्चिममा काजीपोखरी, खहरे खोला र सो पारिको फलेपाटनले सिमाना छुट्याएको छ ।

उत्तरमा पृथ्वी राजमार्ग तथा हलेवी मार्गसँग जोडिएको भूभागभित्रको क्षेत्रलाई छुट्याइएको छ । दक्षिणमा भेडी फार्म, राधाकृष्ण मन्दिर हुँदै रामेश्वरी माविसँग जोडिएको क्षेत्रले सिमाना तोक्ने सूचनामा उल्लेख छ । १ जनवरीबाट व्यावसायिक रुपमा संचालन आएकोमा अझै पनि अन्तर्राष्ट्रिय उडान भने सुरु भइसकेको छैन ।