चर्को ब्याजविरुद्ध पोखरामा रिले अनसन

आदर्श समाज सम्वाददाता
माघ १९, २०७९
Anasan

पोखरा । ‘सम्पूर्ण उद्योगी व्यवसायी एवं पीडित एक हौं’ भन्दै चर्को ब्याजविरुद्ध तीनदिने अनसन सुरु गरिएको छ । सरकारको विभेदपूर्ण आर्थिक नीतिविरुद्ध पहिलो चरणको रिले अनसन थालिएको व्यवसायीले बताएका छन् ।

बैंकले प्रदान गर्ने कर्जाको ब्याजदर एक अंकमा झारिनुपर्ने, कम्तीमा २ वर्षलाई स्वेच्छिक किस्ता छनोट गर्न दिनुपर्ने, कालोधनविरुद्ध नोटबन्दी गरिनुपर्ने, व्यावसायिक सुरक्षाका लागि संक्रमणकालीन योजना ल्याउनुपर्ने, स्वर्गीय प्रेमप्रसाद आचार्य लगायतका व्यवसायीले उठाएका माग सम्बोधन हुनुपर्ने र अनुदान रकम पारदर्शी हुनुपर्ने माग व्यवसायीको छ ।

देशभरि नै विभिन्न आर्थिक दबाबका कारण आत्महत्या गर्ने क्रम बढिरहेको अवस्थामा लौरो अभियानको सहजीकरणमा गठित संयुक्त संघर्ष समितिले प्रथम चरणको अनसन चिप्लेढुंगाको मानवअधिकार चोकमा सुरु गरेको हो । सरोकारवाला तथा सरकारले माग सम्बोधन नगरे अझ सशक्त आन्दोलनका कार्यक्रम घोषणा गर्ने संघर्ष समिति संयोजक खेम तिमिल्सिनाले जानकारी दिए ।

यसैगरी, पोखरा हार्डवयर एसोसिएसन कास्कीले एक अपिल जारी गरी नगदी र मुनाफासहितको कारोबार गर्न सम्बन्धित व्यवसायीलाई आग्रह गरेको छ । संस्थाका अध्यक्ष पृथ्वीराज शर्मा तिमिल्सिना र महासचिव कृष्णप्रसाद कोइरालाले जारी गरेको अपिलमा आर्थिक संकट र चर्को ब्याजदरका बीच पनि लागत भन्दा कम मूल्य र त्यो पनि उधारोमा कारोबार गर्ने गरेको सुन्नमा आएको जनाउँदै व्यावसायिक संकट र व्यवसाय बन्दबाट जोगिन आग्रह गरिएको छ ।

Related News

सम्बन्धित समाचार

hero news full width