पोखरा । प्रदेश नीति तथा योजना आयोग गण्डकीका उपाध्यक्षसहित सदस्यहरुले बुधबार सपथ लिएका छन् । मुख्यमन्त्री खगराज अधिकारीले उपाध्यक्ष डा. गिरिधारि शर्मा पौडेललाई सपथ खुवाए ।
त्यसलगत्तै उपाध्यक्ष पौडेलले सदस्यद्वय डा. सुभाष अधिकारी र डा. शान्ताकुमारी खत्रीलाई सपथ खुवाए । गत आइतबारको मन्त्रिपरिषद बैठकले उनीहरुको नियुक्तिको निर्णय गरेको थियो ।
मुख्यमन्त्री खगराज अधिकारीले पुस २५ समा थप ३ मन्त्रीसहित सपथ लिए पनि योजना आयोगले पूर्णता पाउन सकेको थिएन । गण्डकीका संस्थापक मुख्यमन्त्री पृथ्वीसुब्बा गुरुङ नेतृत्वको सरकारले उपाध्यक्ष नियुक्त गरेका डा. पौडेल नै यसपालि फेरि दोहोरिएका छन् ।
प्रदेशको स्थितिपत्र तयार पार्नेदेखि प्रथम पञ्चवर्षीय योजनाको खाका कोरेर सार्वजनिक गर्ने काम उनै डा. पौडेलले गरेका थिए । अब त्यसलाई अन्तिम चरणमा कार्यान्वयन गर्ने जिम्मा पनि उनकै काँधमा आएको छ ।
कोरोना लगायत समस्याले कतिपय लक्ष्य पूरा गर्न कठिन देखिए पनि लक्ष्य प्राप्तिका लागि सकेसम्म मेहनत गर्ने प्रतिबद्धता डा. पौडेलले जनाए । पौडेल स्याङ्जा आँधिखोलाका हुन् ।
मुख्यमन्त्री कृष्णचन्द्र नेपाली पोखरेलका पालामा माओवादी कोटाबाट सदस्य भइसकेका डा. सुभाष अधिकारी तनहुँका हुन् । डा. शान्ताकुमारी खत्री मुख्यमन्त्री अधिकारीकै क्षेत्रकी हुन् । उनी पृथ्वीनारायण क्याम्पसमा समाजशास्त्र र मानवशास्त्रकी उपप्राध्यापक हुन् ।