पोखरा। स्याङ्जाको आँधिखोला गाउँपालिका–१, पञ्चमूलमा एकै रात १२ ठाउँमा चोरी भएको छ ।  सोमबार राति वडा कार्यालय, सहकारी, पसल, व्यक्तिको घरमा चोरी भएको जिल्ला प्रहरी कार्यालय स्याङ्जाले जनाएको छ ।

‘वडा कार्यालय, घर, पसल लगायतमा चोरी भएको भेटिएको हो,’ जिल्ला प्रहरी कार्यालय स्याङ्जाका प्रमुख राजीवबहादुर बस्नेतले भने, ‘एउटा सहकारी भन्ने कुरा थियो त्यहाँ चोरी भएको छैन । एउटा पसलबाट हार्डडिस्क नै बोकेर गएको रहेछ ।’

१२ स्थानमध्ये सबैभन्दा बढी १ घरबाट साढे १० तोला सुनका गरगहना र २ लाख ५ हजार नगद चोरी भएको उनले बताए । ‘सबै ठाउँबाट कसैकोबाट १ हजार कसैकोबाट २ हजार चोरी भएको भन्ने छ,’ उनले भने, ‘एउटा घरबाट भने साढे १० तोला सुनका गरगहना र २ लाख ५ हजार नगद लगेको भन्ने छ ।’

वडा कार्यालयबाट पनि ३० हजार ४५ हजार रुपैयाँ राजस्व चोरी भएको उनले बताए । त्यस क्षेत्रको मुचुल्का लिएर अनुसन्धान कार्य चलिरहेको उनले बताए । पञ्चमूलको करिब ३ किमी क्षेत्रभित्र ती चोरीका घटना भएका हुन् ।