पोखरा । पोखरामा आगोले जलेर २ जना घाइते भएका छन् । पोखरा १३ काँहुखोलामा डेरा गरी बस्ने कृष्णबहादुर क्षेत्री र घरधनी संगीता सापकोटा जलेर घाइते भएका हुन् ।
जल्नुका कारण पत्ता नलागे पनि कृष्णबहादुरले शरीरमा पेट्रोल छर्केर आगो लगाउने प्रयास गरेको बुझिएको छ । सो दृश्य घरधनी महिला संगीताले देखेर बोतल खोस्दा उनकोे शरीरमा पनि पेट्रोल परेको र आगो लागेको हुन सक्ने अनुमान गरिएको छ । कृष्णबहादुरले अस्पतालमै पनि आफू स्वतन्त्र रुपमा मर्न नपाएको गुनासो गर्दै चिकित्सकलाई उपचार नगर्न आग्रह गरेकाले आत्मदाहको प्रयासको अनुमान गरिएको हो ।

घटनाबारे अनेक अड्कलबाजी भए पनि कसरी भयो यकीन भएको छैन । घटनाप्रति दुबैजनाको परिवार आश्चर्यमा परेका छन् । घाइतेहरुको पोखरा स्वास्थ्य विज्ञान प्रतिष्ठानमा उपचार भइरहेको छ ।

दुई जनामध्ये महिलाको अवस्था गम्भीर छ भने पुरुषको अवस्था सुधारोन्मुख रहेको अस्पतालका निर्देशक डा. भरतबहादुर खत्रीले जानकारी दिए । ‘महिला ८५ प्रतिशत जलेकाले इमर्जेन्सीमा राखेर उपचार भइरहेको छ, अवस्था चिन्ताजनक छ’, डा. खत्री भने, ‘पुरूष २५ प्रतिशतमात्र जलेका छन्, इमर्जेन्सीबाट सर्जरीमा सारेर उपचार भइरहेको छ ।’

स्थानीय र घर परिवारले नै जल्नुको कारण पत्ता लगाउन सकेका छैनन् । प्रहरीले यस विषयमा अनुसन्धानमै रहेकाले केही कुरा भन्न नसकिने जवाफ दिएको छ । पोखरा १३ का अध्यक्ष किरण बरालले पनि जलेको विषयमा आफू पनि अनभिज्ञ रहेकाले अनुसन्धानपछि नै कारण बाहिर आउने बताउँछन् ।

कृष्णबहादुरले आफू स्वतन्त्र रुपमा मर्न नपाएको गुनासो गर्दै चिकित्सकलाई उपचार नगर्न आग्रह गरेकाले आत्मदाहको प्रयास गरेको बुझिन्छ

उद्धारमा खटिएका छिमेकी रामचन्द्र सापकोटाले बिहान सवा ६ बजेतिर घटना भएको जानकारी दिए । ‘बिहान सवा ६ तिर चिच्याएको आवाज आएपछि त्यसतर्फ हेर्दा आगो दन्किएको देखेँ, म पनि गुहार भन्देै त्यहाँ पुग्दा महिला जलिरहेको देखें अनि ढोका फोरर पानी र कपडाको सहयोगले आगो निभाएर ट्याक्सी ल्याएँ,’ उनले भने, ‘मैले ट्याक्सी खाजेर ल्याउँदा बाथरुमबाट कृष्ण दाइलाई पनि आगो नियन्त्रण गरेर ल्याइएको रहेछन् ।’ ट्वाइलेटमा भएको प्लास्टिकका बट्टा, पिर्का र ढोकाका खापाहरु जलेको देखिएको उनले बताए । ‘झट्ट हेर्दा आगो बाथरुममा लगाएर निस्केको जस्तो देखिन्छ,’ उनले भने, ‘संगीता भाउजू कहाँबाट निस्कनुभयो भन्ने थाहा भएन तर कृष्ण सरचाहिँ बाथरुममै हुनुहुँदो रहेछ । अर्को भाइको भनाइ अनुसार उहाँले बाथरुमको पानीले आफूलाई आफैंले उद्धार गर्दै हुनुहुन्थ्यो रे ।’ घाइतेलाई अस्पताल लगेपछि प्रहरीकोमा जानकारी दिएको उनले बताए ।

दुवै जनाको घरपरिवारमा समस्या रहेको बारे आफूलाई थाहा नभएको उनले बताए । संगीताको घरमा कृष्णबहादुर स्टेसनरी पसल राखेका थिए र सोही घरमा डेरा गरी २ छोरी र १ छोरालाई पढाउँदै आएको कृष्णका दाजुले जानकारी दिए । कृष्णका श्रीमती भने शिक्षिका हुन् । मादी ६ तप्राङ स्थायी घर भएका कृष्ण लामो समयदेखि सोही घरमा डेरा गरी बसेका थिए । घटना हुनु अघिल्लो दिन तप्राङमै १५ दिन बसेर शनिबार रातिमात्र पोखरा झरेको उनका दाजुले जानकारी दिए । उनका अनुसार बुहारीको बिदा सकिएकाले शिक्षण पेसामा फर्किनुपर्ने भएपछि छोराछोरीको हेरचाहका लागि कृष्ण पोखरा झरेका थिए ।

यता, संगीताका श्रीमान् भने षड्यन्त्रपूर्वक आफ्नो श्रीमतीलाई आगो लगाएको बताउँछन् । ‘बचाउन जाने क्रममा आगो लागेको भए मेरो श्रीमती जलेर त्यस्तो अवस्थामा हुने अनि जल्न खोज्नेचाहिँ राम्रै कसरी हुन्छ,’ संगीताका श्रीमान्ले भने, ‘यहाँ ठूलो षड्यन्त्र रचिएको छ । यसको कडा छानबिन हुनुपर्छ ।’