पोखरा । त्रिवेणी संगीतालयद्वारा नव प्रतिभा खोजीअन्तर्गत आयोजित सुपर भ्वाइस अफ त्रिवेणीको उपाधि कास्कीका किशोर सुनारले जितेका छन् । प्रतियोगितामा सोलुखुम्बुका विनोद राई दोस्रो र म्याग्दीका राम घर्तीम्रे तेस्रो भए । यसैगरी पाल्पाकी निर्मला सुनारले सान्त्वना स्थान हासिल गरिन् । दर्शक रोजाइमा निशा थारु पुरस्कृत भइन् ।

कात्तिक महिनाबाट सुरु भएको कार्यक्रममा १ सय १८ जनाले भाग लिएकोमा विभिन्न चरण पार्दै अन्तिम प्रतिस्पर्धामा २० जना सहभागी थिए ।

कार्यक्रमका प्रमुख अतिथि नेपाल संगीत नाट्य प्रतिष्ठानका सदस्य प्राज्ञ हरिदेवी कोइरालाले विजयी कलाकारलाई पुरस्कार वितरण गरेकी थिइन् ।

कार्यक्रममा पोखरा प्रज्ञा प्रतिष्ठानका कुलपति पदमराज ढकालले शुभकामना व्यक्त गरे ।

संगीतालयका प्रबन्ध निर्देशक तथा वरिष्ठ संगीताकार नवराज बरालको अध्यक्षतामा भएको सो कार्यक्रमको सञ्चालन राजन बराल र सुनिता बरालले गरेका थिए ।

कार्यक्रमका निर्णायकहरु गीतकार हरिहर खनिया, संगीतकार अभिमन्युविक्रम राणा, गायक सिडी विजय अधिकारी, गायिका लक्ष्मी गिरी र सविना सुनाम थिए ।