पोखरा ।  पोखरा–१३ कुँडहरस्थित बेसलाइन एकेडेमी स्कुलको रजत जयन्ती समारोह शनिबार सम्पन्न भएको छ । सो अवसरमा पुरस्कार वितरण तथा विविध सांस्कृतिक कार्यक्रम समेटिएका थिए ।
गण्डकी प्रदेशका मुख्यमन्त्री खगराज अधिकारीले समारोको उद्घाटन गर्दै गुणस्तरीय शिक्षा अहिलेको आवश्यकता भएको बताए । उनले त्यसका लागि दक्ष जनशक्ति उत्पादनमा शिक्षाको महत्वपूर्ण भूमिका हुने बताए ।
गण्डकी विश्वविद्यालयका कुलपति प्राडा गणेशमान गुरुङले बेसलाइनले विद्यार्थीलाई गुणस्तरीय शिक्षा प्रदान गर्दै आएको र विद्यालय पनि व्यवस्थित भएको आफूले पाएको बताए । उनले आफ्ना सन्तानको नाचगान लगायतका प्रस्तुति अभिभावकको लागि गर्वको विषय भएको बताए ।

विद्यालयका प्रबन्ध निर्देशक षडानन्द गौतमले ७ सय विद्यार्थीले पठनपाठन गर्दै आएको र शिक्षक तथा कर्मचारी संख्या ८४ रहेको जानकारी दिए । समयको मागअनुसार गुणस्तरीय र व्यावहारिक शिक्षा प्रदानमा विद्यालय निरन्तर अघि बढिरहेको विषय पनि उनले अवगत गराए ।

रजत जयन्ती समापन समारोहमा विद्यार्थीलाई विभिन्न शैक्षिक पुरस्कार प्रदान गरिएको थियो । खेलकुद र अतिरिक्त गतिविधिमा उत्कृष्ट प्रदर्शन गरेका विद्यार्थीलाई पनि पुरस्कार प्रदान गरिएको थियो । सो अवसरमा शिक्षक शिक्षिका पनि सम्मानित भए ।

विद्यालय निर्देशक शोभालक्ष्मी पौडेल गौतमको अध्यक्षतामा भएको कार्यक्रममा भद्रकाली माविका प्राचार्य राजेन्द्र भण्डारीले पनि भनाइ राखेका थिए । कार्यक्रम संचालन शिक्षक रामप्रसाद तिमिल्सेनाले गरेका थिए ।

‘पढाउनका लागि पढ, पढ्नका लागि पढाऊ’ भन्दै २०५४ सालमा स्थापना भएको बेसलाइन एकेडेमीले रजत जयन्ती अवसरमा चित्रकला प्रतियोगिता, एकल लोक नृत्य प्रतियोगिता, अंग्रेजी स्क्रयाबल प्रतियोगिता, नेपाली वक्तृत्वकला, सेभेन ए साइड फुटबल, स्वास्थ्य शिविर, मिनी म्याराथन, प्रभातफेरी लगायत कार्यक्रम आयोजना गरेको थियो ।