पोखरा । विश्वहिन्दु महासंघ जिल्ला अध्यक्ष जगन्नाथ कोइरालाको अध्यक्षतामा भएको जिल्ला कार्यसमितिको बैठकले कार्यसमिति सदस्य मीलनप्रसाद तिवारीलाई महासचिव र सन्तु पौडेललाई कोषाध्यक्षको जिम्मेवारी दिएको छ ।

बैंठकले अध्यक्षले पेस गरेको प्रस्ताव सर्वसम्मत पारित गरिएको छ । बैठकले माघ २६ गते पोखरा महानगरको अधिवेशन गर्ने निर्णय गरेको छ । माघ २५ गते हुने प्रदेश कमिटीको साधारण सभामा सक्रिय सहभागी हुने निर्णयसमेत गरेको छ ।

बैठकमा विश्व हिन्दु महासंघ केन्द्रीय उपाध्यक्ष शंकर खरालको विशेष उपस्थिति थियो । उपाध्यक्ष खरालले हिन्दु संस्कारहरुको संरक्षण गर्दै सनातन हिन्दु राज्य बनाउने अभियानमा सबै सँगसँगै लाग्नुपर्नेमा जोड दिए । महासचिवको जिम्मेवारी पाएका मीलनप्रसाद तिवारीले आगामी दिनमा संस्थाको गरिमा र उद्देश्यप्रति पूर्ण समर्पित हँुदै लागिरहने बताए । बैठकमा निवर्तमान अध्यक्ष पार्वती पौडेल, केन्द्रीय सदस्य इन्दिरा कोइराला, कोषाध्यक्ष सन्तु पौडेललगायतले बोलेका थिए ।