पोखरा । श्रीपञ्चमी अवसरमा पोखरेली युवा सांस्कृतिक परिवारले वाङ्मयिक क्षेत्रका दिवंगत स्रष्टाको सम्झना गर्दै साहित्यिक जयन्ती मनाएको छ ।

संगीत तथा नाट्य प्राज्ञ प्रतिस्ठानका पूर्व कुलपति सरुभक्तले सामूहिक साहित्यिक जयन्तीको उद्देश्यमाथि प्रकाश पार्दै संस्थाले २०३५ सालदेखि दिवगंत स्रष्टाहरुको सम्झनामा श्रीपञ्चमीका दिन सामूहिक जयन्ती मनाउँदै आएको बताए । कलाकारलाई बैशाखमा र संगीतकारलाई महाशिवरात्रीमा स्मरण गरिंदै आएको उनले जनाए ।

२०३५ सालमा पहिलो पटक सो कार्यक्रम गर्दा रथमा विभिन्न कवि, साहित्यकारको फोटो राखेर सहर परिक्रमा गरेर विन्ध्यवासिनीमा कोण सभा गरेको उनले स्मरण गरे । उनले यस्ता कार्यक्रमले पुराना साहित्यकार र नयाँ पुस्ताबीचको पुलको काम गर्ने बताए ।

कार्यक्रममा प्राज्ञ रमेश श्रेष्ठ, हनिफ मियाँ, प्रकाश घिमिरे, सरस्वती प्रतीक्षा, लक्ष्मण थापा, इ. कौशलचन्द्र जिसी, मोती भुजेल, शिव त्रिपाठी, प्रकाश आचार्य, शिव संकल्प, हसिना बस्नेत, विकास रोका मगर, एमडी काफ्ले, मिलन गिरी मुक्तिनाथ अधिकारी लगायतका कविले दिवगंत स्रस्टाका सिर्जना वाचन गरेका थिए ।

संस्थाका अध्यक्ष उपेन्द्रप्रसाद पौडेलको अध्यक्षतामा भएको कार्यक्रममा साहित्य संयोजक शरण आँशुले स्वागत र सचिव डा. चैतन्य अधिकारीले संचालन गरेका थिए ।