लमजुङ । लमजुङ प्रहरीले ठगी आरोपमा एक युवकलाई पक्राउ गरेको छ । पक्राउ पर्नेमा मस्र्याङ्दी गाउँपालिका–१, घनपोखरामा स्थायी बसोबास भएका ३५ वर्षीय जीवन गुरुङ हुन् ।

उनले प्रहरीका नाउँमा ७ लाख बढी रकम ठगी गरेको उजुरीपछि जिल्ला प्रहरी कार्यालय, लमजुङबाट खटिएको विशेष टोलीले पोखराबाट उनलाई पक्राउ गरेको हो । उनी विभिन्न महिलाहरूबाट ७ लाख १७ हजार लिई सम्पर्कविहीन भएका थिए ।

जिल्ला प्रहरी कार्यालयका सूचना अधिकारी जगदीश रेग्मीका अनुसार जीवनले आफू प्रहरी हुँ भन्दै विभिन्न व्यक्तिलाई विश्वास दिलाई झुक्यानमा पारी उक्त रकम ठगी गरेको अभियोग छ ।

शुक्रबार लमजुङ जिल्ला अदालतबाट ठगीसम्बन्धी कसुरमा दिन ५ को म्याद लिई थप अनुसन्धान कार्य अघि बढाइएको छ । मुलुकी अपराध संहिता, २०७४ को परिच्छेद– २१ अन्तर्गत यसरी ठगी गर्नेलाई ७ वर्षसम्म कैद र ७० हजारसम्म जरिवाना हुने कानुनी व्यवस्था छ ।