पोखरा । गण्डकी प्रदेशले पूर्ण मन्त्रिमण्डल पाएको छ । मुख्यमन्त्री खगराज अधिकारीले मंगलबार थप ३ मन्त्री नियुक्त गर्दै आफ्नो क्याबिनेट पूर्ण बनाएका हुन् । यहाँ नेकपा (एमाले) बाट ४, माओवादी केन्द्रबाट २ र राप्रपाका १ सांसद मन्त्री बनेका छन् । मुख्यमन्त्री बाहेक एमालेबाट सीताकुमारी सुन्दास आर्थिक मामिला मन्त्री बनेकी छिन् । यस्तै, रोशनबहादुर गाहा आन्तरिक मामिला तथा कानुन मन्त्री बन्दा वेदबहादुर गुरुङ कृषि, ऊर्जा तथा जलस्रोत मन्त्री बने ।

माओवादी संसदीय दलका नेता हरिबहादुर चुमान दोस्रो वरियतासहित भौतिक पूर्वाधार, विकास तथा यातायात व्यवस्था मन्त्री बन्दा रेशमबहादुर जुग्जालीले उद्योग, पर्यटन, वन तथा वातावरण मन्त्रालयको जिम्मेवारी पाएका छन् । राप्रपाका संसदीय दलका नेता पञ्चराम गुरुङले सामाजिक विकास तथा स्वास्थ्य मन्त्रालय सम्हाले । मन्त्री रोशन, वेद र रेशमले मंगलबार साँझ प्रदेश प्रमुख पृथ्वीमान गुरुङसमक्ष पद तथा गोपनीयताको सपथ लिए ।

यसअघि १२ मन्त्रालय रहेको यहाँ घटाएर २०७४ कै अवस्थामा झारिएको हो । ७ मन्त्रालय कायम भएका कारण दलहरुलाई मन्त्री टुंग्याउन निकै सकस भएको थियो । मुख्यमन्त्री अधिकारीले पनि एमालेबाट मन्त्री बन्नेहरुको सूची काठमाडौं पुगेर बनाएको बताइएको छ । पार्टी अध्यक्ष केपी ओली भेट्न सोमबार काठमाडौं गएका मुख्यमन्त्री अधिकारी मंगलबार फर्केर रोशन र वेदलाई मन्त्री बनाउने निर्णयमा पुगेका हुन् ।

रोशनलाई झुक्याइयो !
मुख्यमन्त्री खगराज अधिकारीले विस्वासको मत लिनुअघि रोशनबहादुर गाहा थापालाई प्रमुख सचेतक बनाएका थिए । तर रोशन आफू मन्त्री बन्नेमा विश्वस्त थिए । मंगलबार दिउँसो पनि मुख्यमन्त्रीले उनलाई कार्यकक्षमा बोलाएर अर्थमन्त्रीकै जिम्मा दिने निर्णय भएको बताएका थिए । ‘अर्थमन्त्रीमा उहाँको नाम कम्प्युटरमा चढाएको पक्का हो । सपथ ग्रहणका बेलामा पनि मन्त्रालयको जिम्मेवारी नसुनाई नाममात्रै बोलाइयो,’ एक मन्त्री भन्छन्, ‘अर्थमन्त्री नै हो भनेर उहाँ सपथ लिन जानु भएको थियो ।

सपथ सकिएपछि जिम्मेवारीको पत्र पढेर सुनाउँदा पो अनौठो सुनियो ।’ वरियतामा पाँचौंमा पुगे उनी । त्यतिमात्रै होइन, अर्थबाट आन्तरिक मामिला मन्त्रालयमा सीमित भए ।
मुख्यमन्त्री अधिकारीले अर्थ मन्त्रालय आफैले राख्न चाहेका थिए । प्रदेश सभामा निर्वाचित २२ सांसदमध्ये मुख्यमन्त्रीको सबैभन्दा विश्वासपात्र बेदबहादुर गुरुङपछि सीताकुमारी सुन्दास नै हुन् । गण्डकीको पार्टी राजनीतिमा पूर्व मुख्यमन्त्री पृथ्वीसुब्बा गुरुङ र वर्तमान मुख्यमन्त्री अधिकारीबीचको रस्साकस्सी त्यति धेरै नौलो होइन । पोखरको मेयरमा कृष्णबहादुर थापा पराजीत हुँदा त यसलाई अधिकारी पक्षले पृथ्वीसुब्बा गुरुङसँग जोडेर गतिलै इस्यु बनाइएको थियो ।

अहिले मुख्यमन्त्री अधिकारीको यो कदमलाई पनि त्यही रस्साकस्सीसँग जोडिएको छ । मुख्यमन्त्री अधिकारी बढी आफ्नै गुटमा केन्द्रित भएको विश्लेषण गर्न थालिएको छ । एमालेको प्रदेश कमिटीका एक पदाधिकारीले भने, ‘मुख्यमन्त्रीज्यूले घेरा साँघुरो बनाउँदै जानुभयो, यसबाट पर्ने असर आखिर भोलि देखिहाल्छ ।’

अरुलाई जिल्याइयो
मुख्यमन्त्रीसहित १ मन्त्री कास्की जिल्लाले पाएको छ । स्याङ्जाबाट पनि २ जना मन्त्री बनेका छन् । बढी प्रभावशाली मानिएका मन्त्रालय कास्की र स्याङ्जाले पायो । ७ मन्त्रालय रहेको गण्डकीमा मुख्यमन्त्री खगराज अधिकारी र कृषि, ऊर्जा तथा जलस्रोत मन्त्री वेदबहादुर गुरुङ कास्की क्षेत्र १ का हुन् । अधिकारी (क) बाट चुनाव जितेर आएका हुन् भने गुरुङले (ख) बाट चुनाव जितेका थिए ।

स्याङ्जा १ (क) बाट चुनाव जितेकी सीता सुन्दास अर्थ मन्त्री बनिन् । सोही क्षेत्रका पञ्चराम गुरुङ राप्रपाबाट मन्त्री बनेका छन् । उनी समानुपातिक कोटाबाट सांसद बनेका थिए । दुई क्षेत्रबाट ४ मन्त्री बन्दा भूगोलको प्रतिनिधित्वमा भने पार्टीहरुले ख्याल गरेनन् । कास्की र बागलुङबाट ११÷११ प्रदेश सांसद छन् । ११ सांसदसहित कास्कीले २ मन्त्री पाउँदा बागलुङमा भने मन्त्री छैनन् । बागलुङका लीलाबहादुर थापा मन्त्री बन्ने चर्चा चुलिएको थियो । तर अन्तिममा उनी अधिकारी क्याबिनेटमा अटाएनन् । थापा पृथ्वीसुब्बा गुरुङ निकट मानिन्छन् । एमालेबाट मन्त्री बनेका ४ मध्ये ३ जना खगराजनिकटका हुन् ।

बागलुङले मन्त्री पाउनुपर्नेमा गुटको असर देखिएको एक नेताले बताए । ‘जति हक कास्कीको छ, उत्ति बागलुङको पनि छ । बागलुङमा केन्द्रीय नेता पनि छन्, प्रभाव भएका पनि छन्,’ उनले भने, ‘जबर्जस्ती गुटमा धकेलेर राम्रा मान्छेलाई पछि पारियो । यो अन्याय हो ।’ रोशनलाई पनि मन्त्री नबनाउने तयारीका साथ प्रमुख सचेतक बनाइएको थियो । तर चौतर्फी दबाबपछि उनी मन्त्री बनेका हुन् । बागलुङका सांसद थापाले दलभित्र छलफल नगरी मन्त्रीको टुंगो लगाएको गुनासो गरे । ‘पार्टीमा आकाशबाट निर्णय हुन्छ । हामीसँग कुनै छलफल भएको छैन । यसबारे दलको बैठकमा सोध्छौं, हामी,’ उनले भने ।