पोखरा । एमाले संसदीय दलका नेता खगराज अधिकारीले मुख्यमन्त्रीमा सपथ लिएकै दिन नवलपुरका रोशनबहादुर गाहा थापा पनि मन्त्री बन्ने चर्चा थियो । चर्चा चलिरहँदा सपथ लिने लाइनमा एमालेका तर्फबाट स्याङ्जाकी सीताकुमारी सुन्दास अगाडि आइन् । रोशन भादगाउँले टोपी लगाएर दर्शक दीर्घामा बसे । सरकार निर्माणका लागि प्रदेश सभा सदस्यहरुको हस्ताक्षर संकलन लगायतका काममा उनी निकै खटिएका थिए ।

प्रदेश सभाको अघिल्लो कार्यकालको अनुभव भएका, अघिल्लोपटक पनि मन्त्री हुनबाट छुटेका उनको नाम मन्त्रीका लागि आउनु स्वभाविक पनि थियो । तर त्यसो भएन । उता मुख्यमन् त्रीले विश्वासको मत लिनुभन्दा अगाडि उनै रोशनलाई प्रमुख सचेतक बनाए । रोशनले आफू मन्त्री बन्ने सम्भावना कायमै रहेको बताएका थिए । बीचका केही दिन बित्दासमेत मुख्यमन्त्री अधिकारीले रोशनलाई मन्त्री बनाउनेतिर चासो दिएनन् । रोशनले मुख्यमन्त्रीलाई भेटेरै आफू प्रमुख सचेतकमा नबस्ने, मन्त्रालयको जिम्मा दिन आग्रह गरे । मुख्यमन्त्रीले हुन्छ हुन्न भनेनन् । रोशन मन खुम्च्याएर बसे ।

सोमबार मन्त्रालयको संख्या घटाएर मुख्यमन्त्री अधिकारी काठमाडौं गए । बेलुकै उनी बालकोट पुगेर पार्टी अध्यक्ष केपी शर्मा ओलीलाई भेटे । मन्त्रीका लागि सम्भावित नाम र मन्त्रालयको जिम्मेवारीको टुंगो उतै लगाए । त्यसपछि मंगलबार बिहान प्रधानमन्त्री पुष्पकमल दाहाललाई भेट्न पुगे । त्यहाँ मन्त्रालयको भागबन्डाको कुरा थप परिपक्व बनाइयो । बिहान साढे ७ मा पोखरा फर्कने गरी टिकट लिएका मुख्यमन्त्री अधिकारी बालुवाटार पुग्नै समय लागेकाले १० बजे पछिका लागि टिकट सारियो । ११ बजेतिरको जहाजमा उनी पोखरा फर्किए ।

संसदीय दलको बैठक बसेर मन्त्रीमा पठाउने नाम टुंगो लगाइयो । बेलुका ६ बजे पछिका लागि सपथ लिने गरी प्रदेश प्रमुखको कार्यालयमा मुख्यमन्त्री कार्यालयबाट पत्र पनि पठाइयो । तर त्यतिबेलासम्म रोशन गाहालाई आर्थिक मामिला मन्त्रालयको जिम्मा पाउने भनेर खबर गरिएको थियो । नजिकका साथीभाइलाई पनि उनले अर्थ मन्त्रालयको जिम्मा लिने गरी सपथमा जान लागेको सुनाएका थिए । तर सपथका बेला उनी अचम्म परे । उनलाई त आन्तरिक मामिला तथा कानुन मन्त्रालयको जिम्म्ेवारी पो दिइएको रहेछ । त्यतिबेला उनको अनुहारमा मलिनपन देखिए पनि सकेसम्म त्यसलाई लुकाउन खोजे । अनि पार्टीको प्रदेश तहका पदाधिकारी र आफ्ना निकटका व्यक्तिलाई फोन गरेर आफूलाई ‘झुक्याइएको’ खबर सुनाए । मुख्यमन्त्री अधिकारीको यो कदमले पार्टीवृत्तमा ठूलै तरंग ल्याएको छ ।

मुख्यमन्त्री अधिकारीले अर्थ मन्त्रालय आफैले राख्ने चाहेका थिए । प्रदेश सभामा निर्वाचित २२ सांसदमध्ये मुख्यमन्त्रीको सबैभन्दा विश्वासपात्र बेदबहादुर गुरुङपछि सीताकुमारी सुन्दास नै हुन् । गण्डकीको पार्टी राजनीतिमा पूर्व मुख्यमन्त्री पृथ्वीसुब्बा गुरुङ र वर्तमान मुख्यमन्त्री अधिकारीबीचको रस्साकस्सी त्यति धेरै नौलो होइन । पोखरको मेयरमा कृष्णबहादुर थापा पराजीत हुँदा त यसलाई अधिकारी पक्षले पृथ्वीसुब्बा गुरुङसँग जोडेर गतिलै इस्यु बनाइएको थियो ।

अहिले मुख्यमन्त्री अधिकारीको यो कदमलाई पनि त्यही रस्साकस्सीसँग जोडिएको छ । कास्कीबाटै निर्वाचित वेदबहादुर गुरुङलाई मन्त्री बनाएर अरु जिल्लालाई वास्ता नगर्नुलाई मुख्यमन्त्री अधिकारी बढी आफ्नै गुटमा केन्द्रित भएको विश्लेषण गर्न थालिएको छ । एमालेको प्रदेश कमिटीका एक पदाधिकारीले भने, ‘मुख्यमन्त्रीज्यूले घेरा साँघुरो बनाउँदै जानुभयो, यसबाट पर्ने असर भोलि आखिर देखिन्छ ।’