पोखरा । पोखरा रंगशालाको चारैतर्फ बार लगाइएको छ । बार नाघेर भित्र जाने आँट जो कसैले गर्दैनन् । खेलाडी, प्रशिक्षक, विभिन्न खेलका पदाधिकारी मुल गेटबाटै भित्र छिर्छन् । खेलको दौरान दर्शकहरु पनि मुल गेटबाहेक अरु गेटबाट प्रवेश गर्दैनन् । प्रतियोगिताबाहेक अन्य समय खेलाडी प्रशिक्षकबाहेक अन्य मानिस रंगाशान छिर्दैनन् ।
रंगशालाको कम्पाउन्डभित्र करौडौंको संरचना बनेका छन् केही बनिरहेका छन् । त्यसैले मुल गेटमा सुरक्षा गार्डको प्रबन्ध गरिएको छ । हेरचाह गर्ने मानिसहरु पनि छन् । यसबाहेक रंगशालाभित्र कार्यालय भएको खेल संस्थाले छुट्टै सुरक्षा गार्ड राखेको छ । त्यहाँको संरचनामा क्षति नपुगोस् अनि चोरी नहोस् भनेर राखिएका सुरक्षा गार्डको आँखा छलेर ट्वाइलेटको धाराको टुटी चोरी भएको घटना बाहिरिएको छ ।

हामीले चोरी गर्ने मान्छे पहिचान गर्‍यौं । निगरानीमा राखेका छौं – डिबी नेपाली

पुसमा सहारा क्लबले आयोजना गरेको आहा रारा पोखरा गोल्डकपको दौराना ११ वटा धाराको टुटी हराएको क्लबका अध्यक्ष चित्र पुनले जानकारी दिए । ‘हामीले प्रतियोगिता गर्दा ११ वटा धारा टुटी भेटिएन्,’ उनले भने, ‘प्रतियोगितापछि हामीले हालेर छोडेका हौं ।’ एउटा टुटीको १ हजार ९ सय ५० का दरले हाल्दा २१ हजार ४ सय ५० खर्च भएको उनले बताए । सुरक्षाको घेराभित्र रहेको धाराको टुटी हराउनु सामान्य विषय नरहेको उनको भनाइ थियो । ‘त्यहाँको सुरक्षा गार्डहरुले राम्रोसँग हेरचाह नगरेको हो कि जस्तो लागेको छ,’ उनले भने, ‘गार्ड राख्दा राम्रो मान्छे राख्नुपर्छ ।’

अहिले रंगशालामा तेस्रो टाइगर कप सुरु भएको छ । पोखरा भलिबल प्रशिक्षण केन्द्र नजिकै रहेको ट्वाइलेटमा पनि धाराको टुटी हराएको सहरा क्लबका सदस्य सुदर्शन रञ्जितले जानकारी दिए । प्रदेश सरकारको लगानीमा बनेको शौचालयमा पनि टुटी हराउन सुरु भएको उनको भनाइ थियो । रंगशालामा हुने प्रतियोगितामा केही न केही सामान हराउने हो भने सुरक्षाको चुनौती हुने उनले बताए । यसमा जिल्ला खेलकुल विकास समितिले ध्यान दिनुपर्ने उनको भनाइ छ ।

कास्की जिल्ला खेलकुद विकास समितिका कार्यालय प्रमुख डिबी नेपालीले धाराको टुटी हराएको स्विकार्दै यसको सुरक्षाका विषयमा काम सुरु भइसकेको जानकारी दिए । ‘धाराको टुटी हराएपछि हामीले त्यो चोरी गर्ने मान्छे पहिचान ग¥यौं । त्यसलाई हामीले निगरानीमा राखेका छौं,’ उनले भने, ‘त्यहींभित्रको मानिसले त्यसो गरेको पाइएकाले सहारा र जिल्ला खेलकुद बसेर अब त्यसो नगर्ने शर्तमा छोडेका छौं ।’ प्रदेश सरकारले बनाएको शौचालयमा पनि सोही व्यक्तिले चोरी गरेको हुनसक्ने उनको आकलन थियो । ‘त्यो ट्वाइलेट नवौं राष्ट्रिय खेलकुद भएपछि खोलेका थिएनौं । टाइगर कपका लागि भनेर खोल्ने बेलामा देखियो अनि त्यहींको मान्छे गरेको हो भन्ने भएको छ,’ उनले भने, ‘त्यहींभित्रका मानिसहरुबाट त्यसो भएको पाइएपछि हेरचाह र सरसफाइ गर्नेहरुलाई जस्तो अवस्थामा थियो त्यस्तै बुझाउन निर्देशन भएको छ । रंगशालाको सुरक्षामा अझै चुस्तदुरस्त रुपमा लाग्ने उनको भनाइ थियो ।