पोखरा। नेपाली कांग्रेसनिकट नेपाल राष्ट्रिय मगर संघको दोस्रो गण्डकी प्रदेश अधिवेशन १४ माघ हुने भएको छ । पटक पटक स्थगित हुँदै आएको अधिवेशनको अर्को मिति १४ माघलाई तोकिएको प्रदेश सभापति पदमबहादुर पुनले जानकारी दिए ।

अधिवेशनको कांग्रेस सभापति एवं पूर्व प्रधानमन्त्री शेरबहादुर देउवाले उद्घाटन गर्ने कार्यक्रम छ । अधिवेशनमा पार्टीका केन्द्रीय सदस्य एवं पूर्व मन्त्री शंकर भण्डारी, गण्डकी प्रदेशसभा संसदीय दलका नेता सुरेन्द्र पाण्डेलगायतका नेताको पनि उपस्थिति रहनेछ ।

पोखराको नयाँबजारस्थित प्रदर्शनी केन्द्रमा हुने अधिवेशनमा १० जिल्लाका झण्डै ५ सय प्रतिनिधि सहभागी हुने संघ कास्की जिल्ला सभापति महावीर थापाले जानकारी दिए । जसमा प्रत्येक गाउँपालिकाबाट १ महिला र २ पुरुष, नगरपालिकाबाट २ महिला र ३ पुरुष प्रतिनिधि सहभागी हुनेछन् ।

अधिवेशनले आगामी कार्यकालका लागि नयाँ नेतृत्व निर्वाचित गर्नेछ ।