गण्डकीमा ७ मन्त्रालय राख्ने मन्त्रिपरिषद्को निर्णय

आदर्श समाज सम्वाददाता
माघ ९, २०७९
cabinet

फाइल तस्बिर

पोखरा । गण्डकी प्रदेशमा ७ वटा मन्त्रालय राख्ने निर्णय भएको छ । आज सोमबार बिहान साढे ९ बजे बसेको मन्त्रिपरिषद् बैठकले ७ वटा मन्त्रालय र ती मन्त्रालयको कार्यक्षेत्रका बारेमा समेत टुंगो लगाएको एक मन्त्रीले बताए । मन्त्रालयको नाम र क्षेत्रका बारेमा भने उनले खुलाउन चाहेनन् ।

प्रधानमन्त्री पुष्पकमल दाहाल प्रचण्डले प्रदेश सभा सदस्यको १० प्रतिशत मात्र मन्त्री बनाउने गरी सोच बनाएकाले त्यसै अनुसार काम भएको छ ।
हिजो आइतबार साँझ र आज सोमबार बिहान मुख्यमन्त्री निवासमा बसेको सत्ता गठबन्धनमा आबद्ध ३ दलको बैठकले संख्या टुंगो लगाएपछि मन्त्रिपरिषदको बैठकले निर्णय गरेको हो ।

अब पार्टीहरुबाट मन्त्री हुनेको नाम टुंगो लगाएर मन्त्रालयको जिम्मेवारी दिइने छ । आज साँझ या भोलि बिहानसम्म सरकारलाई पूर्णता दिनेगरी मुख्यमन्त्री खगराज अधिकारीले तयारी गरिरहेका छन् ।

६० सदस्यीय प्रदेश सभा रहेकोमा त्यसको २० प्रतिशतसम्म मन्त्री बनाउन पाइने प्रावधान छ । गण्डकीमा यसअघि १२ मन्त्रालय थिए । सुरुमा ७ मन्त्रालय रहेकामा तत्कालीन सत्ता गठबन्धनमा खटपट सुरु भएपछि पृथ्वीसुब्बा गुरुङले ११ मन्त्रालय राख्ने गरी निर्णय गरेका थिए । एकजना मन्त्री थप्न भ्याए पनि गुरुङले ११ मन्त्री भने बनाउन पाएनन् । जसको सुविधा कृष्णचन्द्र नेपाली पोखरेलले लिए ।

Related News

सम्बन्धित समाचार

hero news full width