पोखरा । सोनाम लोसारका अवसरमा बैदाम तामाङ सेवा समाजले अपांगमैत्री समाज कास्कीका दृष्टिविहीनहरूलाई खाद्यान्न सहयोग गरेको छ । समाजले शनिबार लेखनाथको भण्डारढिकमा रहेको समाजको कार्यालयमा पुगी १५ हजार बराबरको खाद्यन्न सहयोग गरेको समाजका अध्यक्ष ज्याक तामाङले जानकारी दिए ।

समाजका अध्यक्ष तामाङ र सचिव निमा तामाङले अपांगमैत्री समाजका अध्यक्ष दण्डपाणि ढकाललाई सो सहयोग हस्तान्तरण गरेका हुन् । विगतका वर्षहरुदेखि बैदाम तामाङ समाजले समाजका दृष्टिविहिनहरूलाई सहयोग गर्दै आएको समाजका अध्यक्ष तामाङले बताए ।

सो अवसरमा मिस तामाङ पोखरा–२०२३ की विजेता रोश्मा तामाङले ५ हजार रुपैयाँ प्रदान गरिन् । उनले मिस तामाङको विजेता हुँदा सोधिएको प्रश्नमा समाजसेवा गर्ने आफ्नो चाहनास्वरुप सहयोग गरेको बताइन् । तामाङ समुदायले आइतबार धुमधामका साथ लोसार मनाउँदै छन् ।