पोखरा । एसोसिएसन अफ प्राइभेट हेल्थ इन्स्टिच्युसन अफ नेपाल (अफिन) गण्डकीको अध्यक्षमा डा. गिरधारि शर्मा चयन भएका छन् । शनिबार पोखरामा भएको संस्थाको दोस्रो अधिवेशनले सहारा अस्पतालका सञ्चालक शर्मालाई अध्यक्ष्मा चयन गरेको हो । उपाध्यक्षमा चरक मेमोरियल हस्पिटलका कपिल पोखरेल, सचिवमा बिजी हस्पिटलका ऋषि खतिवडा र कोषाध्क्षमा कास्की मोडेल हस्पिटलका सूर्य पोखरेल छन् । सदस्यमा आमाबा हस्पिटलका डा. सन्दीप गोरखाली, फेवासिटी हस्पिटलकी डा. चन्डिका पन्डित, लमजुङ मोडेल हस्पिटलकी कल्पना पौडेल, वालिङ हस्पिटलका शोभाकान्त पौडेल र एपोलो हस्पिटलका चूडामणि दाहाल छन् ।

समितिका आमन्त्रित सदस्यमा नमस्ते हस्पिटलका डा. केशव शर्मा, ग्यालेक्सी हस्पिटलका दिपेन थापा, फेवासिटी हस्पिटलका दिनेशबाबु खड्का र कास्की सेवा हस्पिटलका ऋषिराम सापकोटा छन् ।

कार्यक्रम उद्घाटन गर्दै गण्डकी प्रदेशका मुख्यमन्त्री खगराज अधिकारीले पोखरालाई स्वास्थ्य पर्यटनको हब बनाउने गरी काम गर्नुपर्ने बताए । पोखरामा अन्तर्राष्ट्रिय विमानस्थल सञ्चालनसँगै भारत र चीनका समेत धेरै नागरिकलाई पोखरामा स्वास्थ्य उपचारका लागि आउने वातावरण बनाउनुपर्ने उनको भनाइ छ ।

मुख्यमन्त्री अधिकारीले भने, ‘निजी क्षेत्र, सरकार र सहकारी क्षेत्र मिलेर गण्डकी प्रदेशको राजधानीलाई स्वास्थ्य पर्यटनको हब बनाउने गरी काम गरौ, त्यसका लागि गण्डकी प्रदेश सरकार समन्वय गर्न तयार छ ।’ पोखरा स्वास्थ्य विज्ञान प्रतिष्ठानका उपकुलपति डुकबहादुर क्षेत्री, अफिन केन्द्रका अध्यक्ष डा. पदमबहादुर खड्का, सम्मानित व्यक्तित्व डा. कालु शर्मा लगायतले कार्यक्रममा बोलेका थिए ।

स्वास्थ्य क्षेत्रमा लामो समय सेवारत स्वास्थकर्मीलाई समारोहमा दीर्घसेवा सम्मान गरिएको थियो । डा. कालु शर्मा, नर्स सरीता गुरुङ, फार्मेसिस्ट श्रीराम पराजुली, हरिबहादुर केसी, रेडियोलोजी क्षेत्रमा सेवारत शारदाप्रसाद न्यौपाने र अफिनका संस्थापक अध्यक्ष अशोक पालिखेलाई सम्मान गरिएको हो ।