पोखरा । लामो समयको संवाद र छलफलपछि अन्ततः गण्डकीमा ७ वटै मन्त्रालय राखिने भएको छ । मुख्यमन्त्री खगराज अधिकारीले केन्द्रको निर्देशन अनुसार ७ मन्त्रालय बनाउने र मंगलबारसम्ममा मन्त्री परिषद् विस्तारको तयारी गरेका छन् । ‘सकेसम्म घटाऊ भनेर निर्देशन आएपछि पहिलेकै अवस्थामा पु¥याउन लागिएको हो,’ सरकारको प्रवक्ता समेत रहेकी विना विभागीय मन्त्री सीता सुन्दासले भनिन्, सोमबार बिहान फेरि गठबन्धनका पार्टीसँग बसेर टुंगोमा पुगिन्छ ।
आइतबार अबेरसम्म मुख्यमन्त्री निवासमा सरकार विस्तार र मन्त्रालयको संख्याका बारेमा गठबन्धनमा आबद्ध दलबीच छलफल भएको छ ।

मन्त्रालयको संख्या लगायत विषय टुंग्याउन गठित कार्यदलले मुख्यमन्त्रीलाई विकल्पसहितको प्रतिवेदन बुझाएको छ । ७, ८ ९ वटा मन्त्रालय राख्न सकिने गरी कार्य विभाजनका लागि ५ वटा विकल्प पनि कार्यदलले दिएको छ ।

‘मन्त्रालयको संख्याका बारेमा अन्तिम निर्णय क्याबिनेटले गर्ने हो, ७ मन्त्रालय बनाउन निर्देशन आएपछि सोही अनुसार गर्न एक्सरसाइज भइरहेको छ, सम्भवत सोमबार बेलुकासम्म कार्यभारसहित थप मन्त्रीको सपथ हुन्छ,’ मन्त्री पञ्चराम गुरुङले भने । मुख्यमन्त्री अधिकारीले शुक्रबार विज्ञहरुसँग मन्त्रालयको संख्याका विषयमा सुझाव लिएका थिए । मन्त्रालयको संख्या र मन्त्री परिषद् विस्तार गर्न सत्तारुढ दलहरुसँग संयुक्त बैठक भने नभएको माओवादी संसदीय दलका नेता हरिबहादुर चुमानले बताए ।