पोखरा। पोखरामा जारी प्रथम हिमालय ब्रुअरी तथा १२ औं बगर भाइखलक एट ए साइड अन्तर्राष्ट्रिय भेट्रान्स फुटबल प्रतियोगिताअन्तर्गत तेस्रो दिन बिहीबार ८ खेल भए ।
दोस्रो चरणको पहिलो खेलबाट आयोजक बगर भाइखलक बाहिरिएको छ । पेनाल्टी सुट आउटमा ठमेल भेट्रान काठमाडौंसँग पराजित २–१ ले पराजित हुँदै आयोजक बाहिरिएको हो । निर्धारित समयमा १–१ मा सकिएपछि पेनाल्टी सुटमा आयोजक पराजित भएको हो ।

प्रतियोगितामा सहभागी भारत देहरादुनको युके मास्टर देहरादुन पोखराको दीप युनाइटेडसँग २–१ ले पराजय व्यहोर्दै घर फर्किएको छ । दीपका लागि विजय राई र गंगाबहादुर तामाङले गोल गर्दा देहरादुनका लागि अन्तिम गुरुङले १ गोल फर्काएका थिए ।

लेकसाइड भेट्रान पाहुना टोली बुटवल भेट्रानसँग १–० ले पराजित भएको छ । बुटबलका लागि नरकुमार मगरले निर्णायक गोल गरेका हुन् । चौंथो खेलमा चितवन भेट्रानले काठमाडौंको जोरपाटी भेट्रानलाई ३–१ ले पाखा लगायो ।

हेटौडा भेट्रानले फ्रिडम फाइटर बि टिमलाई १–० ले स्तव्ध पारेको छ भने पश्चिम चितवन भेट्रानले पोखराको गार्डेन एफसीलाई टाइब्रेकरमा ३–२ ले पराजित ग¥यो । अर्को खेलमा थापा गाउँ भेट्रानले नागासोती भेट्रानलाई १–० पराजित गर्दा अन्तिम खेलमा फ्रिडम फाइटर ए ले सानो गौचरन काठमाडौंलाई ३–१ ले पाखा लगायो ।
माघ ८ सम्म संचालन हुने प्रतियोगितामा विदेशी १ सहित २४ टिमको सहभागिता छ । प्रथमले २ द्वितीयले १ लाख साथमा मेडल, ट्रफी र प्रमाणपत्र पाउने छन् । उत्कृष्ट गोलकिपर, डिफेन्डर, मिडफिल्डर, फरवार्ड, प्रशिक्षकलाई ट्रफीसहित ५ हजार पुरस्कार दिइनेछ ।