पोखरा । नेपाल निजामती कर्मचारी युनियन कास्कीले १ वर्षको अवधिमा गरेका कार्य समेटेर तयार पारेको प्रगति प्रतिवेदन नेपाली कांग्रेस जिल्ला सभा सभापति किशोरदत्त बराललाई बुझाएको छ ।

पोहोर पुस २६ मा निर्वाचित भएर आएपछि यो वर्षको पुस २६ गतेसम्म गरेका कार्य समेटेर तयार पारिएको प्रतिवेदन बिहीबार बुझाइएको युनियन कास्की अध्यक्ष सुरेशकुमार श्रेष्ठले बताए । युनियन पार्टीको सुभेच्छुक संस्था भएकाले प्रगति प्रतिवेदन बुझाइएको उनले जनाए । उक्त अवसरमा पार्टीका उपसभापति, सचिव लगायत पदाधिकारी र युनियनका पदाधिकारी र सदस्यहरु उपस्थित थिए ।

सुभेच्छुक संस्था युनियनले प्रतिवेदन पेस गरेर असल अभ्यास सुरु गरेको भन्दै पार्टी सभापति बरालले यसलाई अध्ययन गरी आवश्यक सुझाव दिने प्रतिक्रिया दिए । युनियनका सदस्यहरुले सेवाग्राहीबाट कुनै पनि गुनासो नआउने गरी कार्यसम्पादन गरी संस्थाको छवी उच्च राख्न उनले आग्रह गरे ।