पोखरा । यती एअरलाइन्सको जहाज दुर्घटनाबारे अध्ययन गर्न फ्रान्सबाट विज्ञ टोली पोखरा आएको छ । टोलीले बुधबारदेखि नै घटनास्थल पुगेर अध्ययनसमेत थालेको छ ।
टोलीले घटनास्थलको अध्ययन गर्नुका साथै सरोकावालासँग भेटी दुर्घटनाको कारण पत्ता लगाउने जनाइएको छ । एटिआर विमान निर्माता कम्पनीबाटै यहाँ आएको प्रतिनिधि मण्डलले बुधबार दिउँसोदेखि नै अध्ययन थालेको कास्कीका प्रहरी प्रवक्ता प्रहरी निरीक्षक ज्ञानबहादुर खड्काले जानकारी दिए ।

टोलीमा ९ सदस्य छन् । नेपालमा पहिलो पटक यसरी एटिआर विमान दुर्घटना भएकोले निर्माण कम्पनीले नै चासो दिएको हो । फ्रान्सेली विज्ञ टोलीले दुर्घटनास्थल सेती खोंच आसपासको अध्ययन गर्नुका साथै प्रत्यक्षदर्शी र सरोकारवालासँग कुराकानी गर्ने नेपाल नागरिक उड्ययन प्राधिकरणले जनाएको छ । टोलीले अध्ययनका लागि सुविधासम्पन्न आवश्यक सामग्री बोकेको छ ।

नेपाल सरकारले पनि दुर्घटनाको छानबिन गर्न पूर्व सचिव नागेन्द्र घिमिरेको संयोजकत्वमा ५ सदस्यीय दुर्घटना जाँच आयोग गठन गरेको छ । समितिलाई अध्ययनका ४५ दिनको समय दिइएको छ । सो टोलीले पनि पोखरामै आएर अध्ययन थालेको छ । दुर्घटना जाँच आयोगको सदस्यमा हवाई विज्ञ उपरथी दीपकप्रसाद बास्तोला र अवकाशप्राप्त क्याप्टेन सुनील थापा, हवाई मर्मतविज्ञ एकराज जंग थापा र सदस्यसचिवमा संस्कृति, पर्यटन तथा नागरिक उड्डयन मन्त्रालयका सहसचिव बुद्धिसागर लामिछाने छन् ।

चालक दलका ४ सहित ७२ जना सवार विमान गएको आइतबार बिहान सेती खोंचमा दुर्घटनाग्रस्त भएको थियो । त्यसमध्ये १५ जना विदेशी नागरिक र अन्य नेपाली थिए । दुर्घटनामा परेकामध्ये हालसम्म ७१ जनाको शव फेला परेको छ । १ जनाको खोजी कार्य मंगलबार पनि भएको प्रहरी प्रवक्ता खड्काले बताए । ज्यान गुमाएकामध्ये २२ जनाको पोखरा स्वास्थ्य विज्ञान प्रतिष्ठानमा पोस्टमार्टमपछि परिवारका सदस्य तथा आफन्तलाई बुझाइएको छ । अन्यको शव परीक्षणको लागि काठमाडौं पठाइएको थियो ।