पोखरा । पोखरामा आइतबार मिस तामाङको ग्रान्ड फिनाले हुँदैछ । पोखरा सभागृहमा हुने प्रतियोगिताको उपाधि विजेताले १ लाख रुपैयाँ ताज, ट्रफी, प्रमाणपत्र प्राप्त गर्ने छन् ।

युवापुस्तालाई कला, संस्कृतिको जर्गेनामा सघाउने उद्देश्यले बैदाम तामाङ सेवा समाज पोखराले सो प्रतियोगिता आयोजना गरेको अध्यक्ष ज्याक तामाङले बताए । प्रतियोगितामा लक्ष्मी तामाङ, रेनुका तामाङ, अर्विना तामाङ, जुना तामाङ, नीशा तामाङ, विकिता तामाङ, सुप्रिया तामाङ, योगिता तामाङ, आकृति तामाङ, विपना तामाङ, मनीषा तामाङ, जिना तामाङ, सुमित्रा तामाङ, कृतिका तामाङ र रोश्मा तामाङ प्रतियोगी हुन् ।

कार्यक्रम संयोजक राम लामाका अनुसार फस्ट रनरअपले ५० हजार र सेकेण्ड रनरअपले ३० हजार साथमा ताज, ट्रफी, प्रमाणपत्र हात पार्नेछन् । भ्युवर्स च्वाइसले २० हजार पाउने छन् । कार्यक्रमबाट बचत रकम लेकसाइडमा समाजले निर्माण गरेको रिन्छिङ तोर्जेत तामाङ शान्ति गुम्बा सहयोगार्थ खर्च गरिने समाजका अध्यक्ष ज्याक तामाङले बताए । ग्रान्ड फिनालेमा गायिका डोल्मा ह्याल्मोको प्रस्तुति रहने छ ।

गण्डकीका नवनियुक्र मुख्यमन्त्री खगराज अधिकारीको प्रमुख आतिथ्यमा हुने कार्यक्रममा वरिष्ठ पाइलट एवं कलाकार विजय लामा अर्का आकर्षण हुन् ।