पोखरा । जबर्जस्ती करणी अभियोगमा थुनामा रहेका क्रिकेटर सन्दीप लामिछाने केन्द्रीय कारागार सुन्धराबाट थुनामुक्त भएका छन् । उनी ३ महिना ९ दिन कारागारमा बसेर थुनामुक्त भएका हुन् ।
उच्च अदालत पाटनका न्यायाधीशद्वय रमेश ढकाल र ध्रुवराज नन्दको इजालसले बिहीबार २० लाख धरौटी बुझाएर थुनामुक्त गर्न आदेश दिएको थियो ।

लामिछानेका कानुन व्यवसायी सरोजराज घिमिरेका अनुसार जिल्ला अदालत काठमाडौंको थुनछेक आदेशविरुद्ध उच्चमा पुनरावलोकन निवेदन परेकोमा अदालतले धरौटी लिएर थुनामुक्त गर्न आदेश गरेको हो ।

उनलाई काठमाडौं उपत्यकाबाहिर जाँदा जिल्ला प्रहरी कार्यालय काठमाडौंको अनुमति लिनुपर्नेछ भने पीडित परिवारलाई कुनै पनि माध्यमबाट सम्पर्क गर्न, डर, त्रास वा धम्की दिन नपाउने गरी थुनामुक्त गरिएको हो ।

एक नावालिकाले आफूलाई बलात्कार गरेको आरोप लगाउँदै प्रहरीमा उजुरी गरेपछि सन्दीप त्यसको एक महिनापछि २० असोजमा त्रिभुवन अन्तर्राष्ट्रिय विमानस्थलबाटै पक्राउ परेका थिए । उनीविरुद्ध १० देखि १२ वर्षसम्म कैद सजाय हुनुपर्ने मागसहित काठमाडौं जिल्ला अदालतमा अभियोगपत्र दायर भएको थियो ।