फ्रान्सले फर्कायो १ मिनेटभित्रै २ गोल, खेल अतिरिक्तमा

आदर्श समाज सम्वाददाता
पौष ३, २०७९
messi

पोखरा । कतार विश्वकपमा जीत नजिक पुगेको अर्जेन्टिनाको अग्रता रोक्दै फ्रान्सले बराबरी खेलेको छ । खेल सकिन १० मिनेटमात्र बाँकी रहँदा फ्रान्सका लागि एमबाप्पेले २ गोल फर्काएका हुन् । उनको रोमाञ्चकारी गोलले फाइनल प्रतिस्पर्धा अत्यन्तै रोचक बनेको छ ।

निर्धारित ९० मिनेटको खेल अन्ततः २–२ बराबरीमा सकिएपछि अतिरिक्त समयमा धकेलिएको छ । अब ३० मिनेट अर्जेन्टिना र फ्रान्स दुवैका लागि तेस्रो पल्ट उपाधि चुम्ने स्वप्नील सपनामा गर र मरको स्थिति निश्चित हुनेछ ।

साविक विजेता फ्रान्सका लागि एमबाप्पले खेलको ८० औं मिनेटमा पेनाल्टीमार्फत् गोल गरेको १ मिनेटमै अर्को गोल थपेका हुन् । योसँगै एमबाप्पेले जारी विश्वकपमा सर्वाधिक ७ गोलको कीर्तिमान कायम गरेका छन् । मेस्सी गोल्डेन बुटको दाबेदारीमा १ गोलले पछि परेका छन् ।

कतारको लुसेल स्टेडियममा भएको फाइनलमा अर्जेन्टिनाले खेलको २३ औं मिनेटमै अग्रता लिएको थियो । मेस्सीले पेनाल्टीमार्फत सुन्दर गोल गर्दै टिमलाई अग्रता दिलाएका थिए । फ्रान्सका विङ्गर ओउस्मान डेम्बेलेले एन्जेल डिमारियालाई फाउल गरेपछि अर्जेन्टिनाले पेनाल्टीको अवसर पाएको थियो । जसमा मेस्सी कत्ति पनि चुकेनन् ।

यस्तै, ३६ औं मिनेटमा मेसीकै क्रसमा डिमारियाले विपक्षी कीपर बिट भएको अवस्थामा बललाई जाली चुमाएका हुन् ।

Related News

सम्बन्धित समाचार

hero news full width