म्याग्दी । म्याग्दीमा माटोको ढिस्कोले पुरिएर एक जना निर्माण व्यवसायीको ज्यान गएको छ । जिल्ला सदरमुकाम बेनीस्थित म्याग्दी बहुमुखी क्याम्पसको नयाँ भवन बनाउने क्रममा बुधबार माटोको ढिस्कोले पुरिएर ४५ वर्षीय निर्माण व्यवसायी कृष्ण बरुवालको मृत्यु भएको हो । उनी म्याग्दीको अन्नपुर्ण गाउँपालिका ६ घारका हुन् । उनले ठेक्कामा क्याम्पसको भवन बनाउन लागेका थिए ।

बिहान १० करिब बजेको समयमा भवन निर्माणका लागि जग खन्नेक्रममा नापजाँच गर्न पुगेका बरुवाललाई डोजरले खारेर भिरालो परेको भित्ताको ढिस्को एक्कासि खसेर पुरेको जिल्ला प्रहरी कार्यालयले जनाएको छ । उनी पुरिएको करिब साढे १ घण्टापछि प्रहरी र स्थानीयवासीले डोजरको सहायताले उद्धार गरी बेनी अस्पतालमा पु¥याइएको थियो ।

प्रहरी नायव उपरीक्षक तिलक भारतीका अनुसार अस्पताल पु¥याइएलगत्तै बरुवाललाई चिकित्सकले मृत घोषणा गरेका थिए । कांग्रेस घार वडा इकाइ सभापति समेत रहेका बरुवाल ठेक्का लिएको योजनाको काम समयमै सम्पन्न गर्ने सीमित निर्माण व्यवसायीमध्येमा पर्दथे । उनी निर्माण व्यवसायी संघ म्याग्दी कार्यसमिति सदस्य समेत थिए । उनको निधनले घार गाउँ शोकमा डुबेको छ ।