सकियो समानुपातिक मतगणना, एमालेलाई सर्वाधिक ३४ सिट

आदर्श समाज सम्वाददाता
मंसिर २०, २०७९
commission

पोखरा । प्रतिनिधिसभा र प्रदेशसभा निर्वाचनअन्तर्गत समानुपातिकमा नेकपा (एमाले) पहिलो पार्टी बन्दै सर्वाधिक ३४ जितेको छ । गएको ४ मंसिरमा भएको मतदानको प्रत्यक्ष र समानुपातिक दुवैको मंगलबार साँझ गणना सकिएको हो । २ सय ७५ सदस्यीय प्रतिनिधिसभामा १ सय ६५ जना प्रत्यक्षतर्फ र समानुपातिकमा १ सय १० जना निर्वाचित हुने व्यवस्था छ ।

समानुपातिक पद्धतिबाट निर्वाचित हुने १ सय १० सिटमध्ये दलहरुले पाउने सिट संख्या पनि करिब टुंगो लागेको छ । कुल १ करोड ५ लाख ६० हजार ६७ मत सदर भएकोमा समानुपातिकमा एमाले २८ लाख ४५ हजार ६ सय ४१ मतसहित पहिलो दल बनेको हो । जसअनुसार एमालेले ३४ सिट पाउनेछ । प्रत्यक्षतर्फ ४४ सिट जितेको एमालेको समानुपातिकमा ३४ सिटसहित कुल ७८ हुनेछ ।

यसैगरी, प्रत्यक्षमा पहिलो दल बनेको नेपाली कांग्रेसले २७ लाख १५ हजार २ सय २५ मत पाएको छ । यस अनुसार कांग्रेसले एमालेभन्दा २ सिट कमसहित ३२ सिट पाउने छ । कांग्रेसले प्रत्यक्षतर्फ ५७ सिट जितेको छ । अब उसको कुल सांसद संख्या ८९ हुनेछ ।

७ पार्टीले राष्ट्रिय पार्टीको मान्यता पाए

प्रत्यक्षमा तेस्रो दल नेकपा (माओवादी केन्द्र) समानुपातिकमा पनि तेस्रो बन्यो । माओवादीले ११ लाख ७५ हजार ६ सय ८४ मत प्राप्त गरेसँगै १४ सिट पाउनेछ । प्रत्यक्षतर्फ १८ सिट जितेको अब कुल सिट संख्या ३२ हुनेछ

राष्ट्रिय स्वतन्त्र पार्टी (रास्वपा) र राप्रपाले राम्रो मत पाए । ठूला दलको मत उनीहरुलाई गएको पाइन्छ । प्रत्यक्षमा ७ सिट जितेको रास्वपाले समानुपाातिकतर्फ १३ सिटसहित कुल २० सिट बनाउने भएको छ । समानुपातिकमा उसको ११ लाख ३० हजार ३ सय ४४ मत आयो । रास्वपा चौथो हुँदा राप्रपा पाँचौं बन्यो । विगतमा थ्रेस होल्ड नकटाएकोमा राप्रपाले अहिले ५ लाख ८८ हजार मत पाएको छ । प्रत्यक्षतर्फ ७ सिट जितेको उसले समानुपातिकमा पनि ७ सिट नै पाउनेछ ।

त्यस्तै, जनमत पार्टी र जनता समाजवादी पार्टी नेपालले ५/५ सिट समानुपातिकमा पाएका छन् । प्रत्यक्षतर्फ जनमतले १ र जसपाले ७ सिटमा जित हात पारेको छ । जनमत पार्टीले ३ लाख ९४ हजार ५ सय ६६ मत र जसपा नेपालले ४ लाख २१ हजार ३ सय १३ पाए । अहिलेको चुनावबाट योसहित ७ पार्टीले राष्ट्रिय पार्टीको मान्यता पाएका हुन् । नेकपा (एकीकृत समाजवादी) ले २ लाख ९८ हजार ३ सय ९१ मत प्राप्त गरेको छ । केही हजार मत नपुगेर माधवकुमार नेपाल नेतृत्वको एकीकृत समाजवादी राष्ट्रिय पार्टी बन्न सकेन ।

Related News

सम्बन्धित समाचार

hero news full width