गण्डकी सरकारमा नेतृत्व कसको ?

प्रकाश ढकाल
मंसिर २०, २०७९
Gandaki Cabinet building

पोखरा । गण्डकीका ३६ वटै निर्वाचन क्षेत्रको गणना सकिएको छ । प्रत्यक्षतर्फ १८ सिट जित्दै कांग्रेस पहिलो पार्टी बनेको छ । दोस्रो दल नेकपा (एमाले) ले १२ सिट जित्दा नेकपा (माओवादी केन्द्र) ले ५ सिटमा चित्त बुझाएको छ । स्वतन्त्र उठेर निर्विरोध एक सांसदले एकीकृत समाजवादी रोजेका छन् ।

समानुपातिकमा भने एमाले अगाडि छ । गण्डकीमा १० सिट एमालेले समानुपातिकबाट ल्याउँदा कांग्रेसको ९, माओवादीको ३ र राप्रपाको २ सिट रहन्छ । २०७४ को चुनावमा दोस्रो भएको कांग्रेस अहिले गण्डकीमा ठूलो दल सावित भएको छ । ६० सदस्य रहने प्रदेश सभामा २७ सिटसहित कांग्रेस आउँदा सरकारको नेतृत्व कसले गर्ने भन्ने बहस गण्डकीमा सुरु भएको छ । गठबन्धन बनाएर चुनावमा सहयात्रा गरेको माओवादीले समग्रमा ८ सिट जित्ने देखिन्छ । एमाले २२ र राप्रपा २ सिटमा सीमित हुन्छ । स्वतन्त्रमा उठेर निर्विरोध राजीव गुरुङ (दीपक मनाङे) सोमबारमात्रै एकीकृत समाजवादीमा प्रवेश गरेपछि गठबन्धन अझै दरिलो भएको छ । प्रदेश सरकार गठनको विषय गण्डकीको चासो भए पनि निर्णय केन्द्रमै निर्भर छ । सबै पार्टीको केन्द्रीय नेतृत्वले जे निर्णय गर्छ, त्यसकै पालना यहाँका नेताहरुले गर्ने हुन् ।

२०७८ सालमा गठबन्धन टुटेपछि जेठ २९ गते गण्डकीमा कांग्रेस नेतृत्वमा सरकार बन्यो । त्यसको प्रमुख साझेदार माओवादी केन्द्र नै थियो । तत्कालीन समयमा माओवादीले आधा–आधा कार्यकाल सरकारको नेतृत्व पाउनुपर्ने दाबी गरेको थियो । यद्यपि लिखित सहमति भने थिएन । अहिले माओवादीले तत्कालीन समयको गुन गण्डकीमा कांग्रेसले तिर्नुपर्ने तर्क गर्दै आएको छ ।

संसदीय दलको नेता समेत भइसकेका माओवादीबाट नवनिर्वाचित सांसद हरिबहादुर चुमान सरकारको नेतृत्व आलोपालो हुनुपर्ने बताउँछन्

यसअघि संसदीय दलको नेता समेत भइसकेका नवनिर्वाचित सांसद हरिबहादुर चुमानले सरकारको नेतृत्व आलोपालो हुनुपर्ने बताए । ‘पहिले पनि आलोपालो सरकार चलाउने कुरामा सल्लाह भएको थियो । लिखित सहमति गरेका थिएनौं । लुम्बिनीमा आधा अवधिपछि कांग्रेसले नेतृत्व गर्ने र गण्डकीमा माओवादीको नेतृत्व हुने कुरा थियो,’ उनले भने, ‘तर छोटो अवधि भएकाले नेतृत्व फेर्नतिर लागेनौं । अबको नेतृत्वमा जाने पालो हाम्रो हो । लुम्बिनीमा कांग्रेसको नेतृत्व हुन्छ ।’ उनले कांग्रेसले विगतको गुन इमानदारिताका साथ फिर्ता गर्नुपर्ने बताए । ‘प्रदेशलाई गति दिने नेतृत्व चाहिएको छ । त्यसका लागि हामी सबै इमानदार हुनुपर्छ,’ चुमान भन्छन्, ‘राजनीतिमा इमान्दारिता भएन भने जनताले दुख पाउँछन् । सबै इमानदार भएर गण्डकीको विकासमा लाग्नुपर्छ भन्ने लाग्छ ।’

सरकार गठनका लागि बैठक नबसे पनि गण्डकीमा गठबन्धन दलका नेताहरुबीच निरन्तर संवाद भइरहेको छ । नेपाली कांग्रेस गण्डकी प्रदेश सभापति शुक्रराज शर्माले गण्डकीको नेतृत्वमा कांग्रेसकै दबी रहने बताए । ‘चुनावपछि गठबन्धन दलबीच बैठक त भएको छैन । तर संवाद चलिरहेको छ । प्राकृतिक नियमले पनि यहाँको सरकारको नेतृत्व कांग्रेसकै हो,’ उनले भने, ‘कांग्रेसभन्दा अरुले नेतृत्व गर्नु प्राकृतिक नियम विपरीत हुन्छ । ८ सिट भएकोलाई नेतृत्व गर्न दिने कुरा सहज होइन ।’

उनले पूरा नतिजा आएपछि सरकार गठनबारे थप छलफल गर्ने बताए । कांग्रेसको आइतबार बसेको बैठकले पनि गण्डकी प्रदेश र केन्द्रमा कांग्रेसकै नेतृत्वमा सरकार बनाउन पहलकदमी गर्ने निर्णय गरेको शर्माले बताए । ‘आइतबार पदाधिकारी बैठक बसेको छ । कांग्रेससहित सत्ता गठबन्धन बहुमतमा पुगेका छौं,’ उनले भने, ‘मतदान गर्ने मतदाताप्रति धन्यवाद व्यक्त गर्‍यौं । अब स्थायी सरकारको पहल गर्छौं ।’ एमाले भने गण्डकीमा सरकारको रेसमा नरहेको संगठन विभाग प्रमुख तथा प्रदेश सांसद खगराज अधिकारीले बताए । सत्ता गठबन्धनका नवनिर्वाचित सांसदहरु अहिले केन्द्रीय नेतृत्व फकाउन काठमाडौं पुगेका छन् ।

गोरखाबाट चुनाव जितेका कांग्रेसबाट केन्द्रीय सदस्य सुरेन्द्रराज पाण्डे मुख्यमन्त्रीको प्रवल दाबेदार हुन् । नवलपुरका महेन्द्रध्वज जिसी, स्याङ्जाबाट निर्वाचित भोजराज अर्याल र कास्कीका सांसद बिन्दुकुमार थापा पनि मुख्यमन्त्रीको रेसमा छन् । माओवादीबाट हरिबहादुर चुमानले दाबी गरेका छन् । एमालेले सरकारको नेतृत्व गरे खगराज अधिकारी मुख्यमन्त्री बन्ने प्रवल सम्भावना छ । यद्यपि समानुपातिक सांसदको चयन नभएकोले संसदीय दलको नेता छान्ने प्रक्रिया अघि बढेको छैन । त्यसअघि प्रदेशसभामा उनीहरुले सांसदको सपथ लिनुपर्छ ।

Related News

सम्बन्धित समाचार

hero news full width