स्याङ्जा । गण्डकी प्रदेश अन्तर्गत स्याङ्जा क्षेत्र २ बाट प्रतिनिधि सभा सदस्यमा नेपाली कांग्रेसका उपसभापति धनराज गुरुङ निर्वाचित भएका छन् । उनले शनिबार सम्पन्न अन्तिम मतपरिणाममा एमाले सचिव पद्मा अर्याललाई ५६ सय बढी मतान्तरले पराजित गर्दै निर्वाचित भएका हुन् । स्याङ्जा २ मा संघ सहित प्रदेशसभामा समेत कांग्रेस निर्वाचित भएको छ । प्रदेश २(१) मा भोजराज अर्याल र प्रदेश २(२) मा महेश भट्टराई निर्वाचित भए ।

पहिलो पल्ट प्रत्यक्षमा चुनाव लडेका धनराज गुरुङले अर्याललाई ५ हजार ६ सय २७ मतान्तरमा पराजित गर्दै निर्वाचित भएका हुन् । उनले ३१ हजार ४ सय ६६ र अर्यालले २५ हजार ८ सय ३९ मत प्राप्त गरेका हुन् । निर्वाचन अधिकृतको कार्यालयले भने आधिकारिक घोषणा गरेको छैन । राष्ट्रिय स्वतन्त्र पार्टीका टीकराज गुरुङले ८ हजार १ सय १३ मत ल्याउँदै तेस्रो बने ।

२०७४ सालको चुनावमा बाम गठबन्धनबाट चुनाव लडेकी पद्मा अर्यालले त्यसबेला कांग्रेस नेता गोपालमान श्रेष्ठलाई हराएकी थिइन् । पूर्व मन्त्री अर्याल २०७४ अघि समानुपातिक सांसद थिइन् ।
यसैगरी, प्रदेशसभातर्फ कांग्रेसका महेश भट्टराईले एमालेका डा. बुद्धिमान श्रेष्ठलाई पराजित गरेका छन् । प्रदेश सभा २(१) मा भोजराजले शुक्रबार नै एमालेका मोहन रेग्मीलाई २ हजार बढी मतान्तरले पराजित गर्दै प्रदेश सभा निर्वाचित भइसकेका छन् ।