पोखरा । इन्सेक गण्डकी प्रदेश कार्यालयद्वारा माछापुच्छ्रे गाउँपालिकामा मानवअधिकार समूहका सदस्य र सरोकारवालाका लागि क्षमता अभिवृद्धि तालिम सुरु भएको छ ।

गाउँपालिका अध्यक्ष मीनबहादुर गुरुङले लक्षित वर्गको हकअधिकारको लागि मानवअधिकार समूहले काम गर्ने विषयमा विश्वस्त रहेको बताए । गाँउपालिका लगायत सबै वडा वडाबाट पनि मानवअधिकार समूहमार्फत गाउँपालिकासँग समन्वय गरेर मानवअधिकारका सवाललाई उठाउने बताए ।

कार्यक्रममा गाउँपालिका उपाध्यक्ष सीता अधिकारीले तालिम फलदायी हुने विश्वास व्यक्त गरिन् ।

राष्ट्रिय मानवअधिकार आयोग, गण्डकी प्रदेश प्रमुख मायादेवी शर्माले आगामी दिनमा मानवअधिकारका विषय नीतिगत रुपमा सम्बोधन गर्नका लागि यस्ता तालिमहरुले थप मद्दत पुग्ने बताइन् । मानवअधिकारको संरक्षण र सम्वद्र्धनको लागि राज्यलाई जवाफदेही र जिम्मेवार बनाउन सबै क्षेत्रको पहल आवशयक रहेको उनको भनाइ थियो ।

इन्सेक गण्डकी प्रदेश प्रमुख शिव खकुरेलको अध्यक्षतामा भएको उद्घाटन कार्यक्रममा कार्यक्रमको उद्देश्य र स्वागत इन्सेकका कार्यक्रम अधिकृत सवनम शर्माले गरेकी थिइन् । कार्यक्रम संचालन कास्की जिल्ला सहजकर्ता सुष्मा आचार्य अधिकारीले गरिन् ।

तालिम २ दिनसम्म संचालन हुनेछ । सो अवसरमा मानवअधिकारको अवधारणा, आर्थिक, सामाजिक तथा सांस्कृतिक अधिकार, जनवकालत, शिक्षा, स्वास्थ्य, वातावरण र जातीय विभेदविरुद्धको अधिकारसम्बन्धी गाउँपालिकाको निति तथा कार्यक्रम र कार्यान्वयनको अवस्था लगायत विषयमा तालिम दिइन् । जसको इन्सेक प्रदेश संयोजक शिव खकुरेल, कार्यक्रम अधिकृत सवनम शर्मा, प्रमुख प्रशासकीय अधिकृत वेदहरि अधिकारी, राष्ट्रिय मानवअधिकार आयोगको प्रमुख मायादेवी शर्मा, सहजकर्ता शुष्मा आचार्य अधिकारीले सहजीकरण गर्ने छन् ।