पोखरा । पोखरामा ‘नारायणगोपाल स्मृति साँझ–२०७९’ आयोजना हुने भएको छ । उनको पुण्यतिथि पोखरा रेडियो अन्नपूर्ण, पोखरेली युवा सांस्कृतिक परिवार र पोखरा सांगीतिक कलाकार संघले संयुक्त रुपमा मंसिर १९ मा सो कार्यक्रम गर्न लागेका हुन् ।

पोखरा उद्योग वाणिज्य संघमा हुने नारायण गोपाल साँझमा गायकगायिका रामभक्त जोजिजु, विनोद बानियाँ, इतु जोजिजु, सन्तोष बस्याल, एमडी काफ्ले, रजनी राई र उषा गुरुङले नारायण गोपालद्वारा संगीतबद्ध तथा स्वरवद्ध गीत प्रस्तुत गर्ने छन् ।

१९९६ असोज १८ मा काठमाडौंको किलागलमा जन्मिएका उनको २०४७ मंसिर १९ मा निधन भएको थियो । उनका डिस्क र टेपमा गरी १ सय ३६ वटा गीत रेकर्ड छन् ।

स्वरसम्राट नारायणगोपालका गीतलाई पछिल्लो पुस्तामाझ चिनाउने उद्देश्यले कार्यक्रम आयोजना गर्न लागिएको रेडियो अन्नपूर्णका अध्यक्ष विश्वशंकर पालिखेले बताए । अग्रज श्रष्टाको योगदानको कदर स्वरुप स्मृति साँझ आयोजना गरिने पोयुसाँप अध्यक्ष उपेन्द्र पौडेलले बताए ।

रेडिया अन्नपूर्णले उनको स्मृति दिवसमा विगतमा पनि विविध कार्यक्रम गर्दै आएको थियो ।