पोखरा । प्रत्यक्ष अवलोकनमा आधारित महिला हस्तकला तथा सीप तालिम प्रदर्शनी शुक्रबारदेखि सुरु भएको छ ।

बिहीबार महिला सीप विकास संस्थाको सभाहलमा तालिम उद्घाटन गर्दै सिटिइभिटीको आङ्गिक शिक्षालय अन्नपूर्ण बहुप्राविधिक शिक्षालय प्रिन्सिपल मोतीमाया सुवेदीले प्रशिक्षार्थीलाई सक्रियातापूर्वक सहभागी भएर तालिमबाट दक्षता हासिल गर्न आग्रह गरिन् । उनले निशुल्करुपमा हातमा सीप र दिमागमा ज्ञान लिन पाइने अवसरको सदुपयोग गर्न जोड दिइन् । आफूले आफैँलाई बनाउन केही कुरामा त्याग गर्नै पर्ने भएकाले १२ दिनको सीप सिकाइलाई पहिलो पाइला मान्न आग्रह गरिन् ।

कास्की पोखरा हस्तकला संघ अध्यक्ष रामकली खड्काले सीप सिकाउँदैमा मात्रै महिलाको जीवनस्तर नउठ्ने तर सिकेको सीपलाई निरन्तरता दिनुपर्ने सुझाव दिइन् ।

संघ कोषाध्यक्ष गोमा ढकालले महिलाको समय त्यसै खेर गइरहेको अवस्थामा सदुपयोग गरेर दुईचार पैसा आर्जन गर्दा आत्मनिर्भरताको बाटो समात्न सजिलो हुने बताइन् । महिलाहरूले उत्पादन गरेको हस्तकलाका सामग्रीको बिक्री कक्ष आवश्यक रहेको उनको भनाइ थियो ।

पोखरा उद्योग वाणिज्य संघले शुक्रबारदेखि सुरु गर्ने राष्ट्रिय औद्योगिक व्यापार मेला-२०७९ को छेको पारेर प्राविधिक शिक्षा तथा व्यावसायिक तालिम परिषद् गण्डकी प्रदेश कार्यालय र कास्की पोखरा हस्तकला संघको सहकार्यमा प्रत्यक्ष अवलोकनमा आधारित हस्तकला तथा सीप तालिम प्रदर्शनी सञ्चालन गरिएको हो ।

औद्योगिक व्यापार मेलामा महिला हस्ताकलाका सामग्रीको प्रदर्शनी र प्रत्यक्ष रूपमा सीप सिकाइ र तालिमको अवलोकन गरी लाभ लिन सकिने छ । तालिममा २० जना महिलालाई सीप सिकाइने छ । गुडिया र कुसन बनाउने तालिमका लागि कविता विसुङ्खे र प्राकृतिक रेशा एवं खोस्टाबाट हस्तकलाका सामग्री बनाउने सीपका लागि हिमकुमारी पुनले प्रशिक्षकको भूमिका निर्वाह गरेको विधाता हस्तकला तथा प्राविधिक तालिम केन्द्रकी मुख्य प्रशिक्षक सविता श्रेष्ठ रञ्जितले बताइन् ।

कास्की पोखरा हस्तकला संघकी अध्यक्ष रामकली खड्काको अध्यक्षतामा भएको तालिम उद्घाटन समारोहको सञ्चालन संघ सचिव बुद्धि पुर्जा र स्वागत उपाध्यक्ष सीता गुरुङले गरेकी थिइन् ।