लमजुङ । लमजुङ सदरमुकाम बेसीसहरसँग जोडिएको एकमात्र सडक फेरि एक साताका लागि बन्द गरिएको छ । साढे ५ महिनापछि खुलेको डुम्रे–बेंसीसहर सडक मर्मतका लागि भन्दै फेरि बन्द गरिएको हो ।

डुम्रे–बेसीसहर–चामे राजमार्गमा पर्ने लमजुङको बेसीसहर नगरपालिका–१ को उदीपुर खण्डको देउराली डाँडाको सडक राम्रोसँग सञ्चालनमा ल्याउन मर्मतका लागि बन्द गरिएको हो । उदीपुर जंगल छेउमा पहिरोले गएको असार ४ मा क्षति पुर्‍याएपछि सडक अवरुद्ध भएको थियो । अवरुद्ध सडक प्रतिनिधि सभा तथा प्रदेश सभा निर्वाचन ध्यानमा राखेर एक साता लगाएर अस्थायी सडक निर्माण गरी सञ्चालमा ल्याइएको थियो ।

सडक फराकिलो बनाएर वर्षायाममा समेत सहज सञ्चालन हुने गरी मर्मत गर्न सडक बन्द गरिएको डुम्रे–बेसीसहर–चामे सडक योजनाका प्रमुख अच्युतविलास पन्तले बताए । वैकल्पिक सडक निर्माण गरिएसँगै साढे ५ महिनापछि गाडी सञ्चालनमा आएका हुन् । सडक बन्द भएपछि यसअघिकै डाइभर्सन सडकमार्फत सवारीसाधन आवतजावत हुन थालेको छ ।