सकियो साताव्यापी क्यालिब्रेसन उडान

आदर्श समाज सम्वाददाता
मंसिर १३, २०७९
calibration flight (2)

पोखरा । आगामी जनवरी १ देखि औपचारिक उडान सुरु गर्न लागेको पोखरा अन्तर्राष्ट्रिय विमानस्थलको क्यालिब्रेसन फ्लाइट (यान्त्रिक परीक्षा उडान) पूरा भएको छ । गएको ५ मंसिरदेखि एक सातासम्म भएको फ्लाइटपछि अब एरो थाई कम्पनीले ३ साताभित्र प्रतिवेदन बुझाउनेछ ।

थाइल्याण्डबाट यहाँ आएको विमानको क्यालिब्रेसनको बखत विभिन्न यान्त्रिक परीक्षण सफलतापूर्वक पूरा भएको विमानस्थल आयोजना प्रमुख विनेश मुनंकर्मीले बताए । प्रतिवेदन कम्पनीले बुझाएपछि मात्र नयाँ विमानस्थलमा परीक्षण उडान हुने गर्दछ । र, परीक्षण उडान समेत सफल भएपछि व्यावसायिक उडान सुरु हुने छन् । विमानस्थलमा अंग्रेजी नयाँ वर्ष पुस १७ अर्थात् जनवरी १ देखि औपचारिक उडान गर्ने लक्ष्य छ ।

निर्माण आखिरीमा परेको विमानस्थलमा नेपाल नागरिक उड्डयन प्राधिकरणले यान्त्रिक परीक्षण उडान गर्ने तालिका स्वीकृत गरेबमाजिम उडान भएको प्रवक्ता अनुप जोशीले जानकारी दिए ।

क्यालिबे्रसन फ्लाइटका कारण चालु रहेको यहाँको विमानस्थलमा केही उडान प्रभावित भएको थियो । त्यसबेला बिहान १० बजेभन्दा अघि र दिउँसो १ देखि साढे २ सम्म मात्र चालु विमानस्थलबाट उडान भए ।

पोखरा विमानस्थलबाट हाल काठमाडौं, जोमसोम, भरतपुर, भैरहवा, धनगढी र नेपालगञ्जका लागि नियमित उडान हुने गर्दछ ।

नेपालका करिब दुई दर्जन राष्ट्रिय गौरवका आयोजनामध्ये पोखरा क्षेत्रीय अन्तर्राष्ट्रिय विमानस्थल एक हो । सन् २०२१ जुलाई १० सम्म निर्धारित समय तोकिएकोमा ६ महिनाअघि नै संचालन हुने गरी तीव्र भए पनि कोरोनाले निर्माण प्रभावित बनेको थियो । चिनियाँ कम्पनी सिएएमसी इञ्जीनियरिङले सन् २०१७ नोभेम्बरदेखि काम थालेको थियो ।

विमानस्थलको रन–वे २ हजार ५ सय मिटरको छ । नेपालले चिनियाँ सरकारसँग २२ अर्ब रुपैयाँ ऋण लिएर निर्माण थालिएको यो विमानस्थल त्रिभुवन अन्तर्राष्ट्रिय विमानस्थलको विकल्प रुपमा हेरिएको छ ।

Related News

सम्बन्धित समाचार

hero news full width