पोखरा । गण्डकीमा सबै क्षेत्रको नतिजा आइसक्दा स्याङ्जा क्षेत्र २ को मतगणना अझै अनिश्चित छ । मंगलबारसम्म प्रतिवेदन बुझाउने भनिएकोमा अझै बुझाउन नसक्दा त्यहाँको संशय यथावत् छ ।

निर्वाचन आयोगका कानुन सहसचिव फणीन्द्र गौतम नेतृत्वको टोली गएको शुक्रबार स्थलगत अवलोकन तथा छलफलका वालिङ गएको थियो । टोलीले जिल्लास्थित सुरक्षा निकाय, प्रशासन, आन्दोलनरत दल, बुथ कब्जा भएका भनिएका मतदान केन्द्रमा खटिएका मतदान अधिकृत, सहायक मतदान अधिकृतहरुसँग छलफल गरी काठमाडौं फर्केकोमा ३ दिनभित्र प्रतिवेदन बुझाउने जनाइएको थियो ।

मंसिर ४ को मतदानपछि निर्वाचन अधिकृतको कार्यालयमा सबै स्थानबाट मतपेटिका प्राप्त भइसकेपछि एमाले लगायत दलहरुले कांग्रेसद्वारा बुथ कब्जा भएको आरोप लगाउँदै पुनःमतदान माग गर्दै धर्ना दिएका छन् । कांग्रेसले चापाकोट ३, ४ र ५ का ४ वटा मतदान केन्द्रमा बुथ कब्जा गरी धाँधली गरेको उनीहरुको आरोप छ । तर कांग्रेससहित गठबन्धनका दलले विधि र प्रक्रिया पूरा भएर निर्वाचन कार्यालयमा सुरक्षित आएको जनताको अभिमत तत्काल गणना गरेर निकास निकाल्नुपर्ने माग गरेका छन् ।

दुबै पक्षले निर्वाचन अधिकृतको कार्यालयमा धर्ना दिएपछि सम्भावित घटना मध्यनजर गर्दै सुरक्षा ब्यवस्था कडा पारिएको छ ।