‘आधा शिर उचालेर’ को चर्चा

आदर्श समाज सम्वाददाता
मंसिर ११, २०७९
poem

पोखरा । कवि ज्योति जंगलको कविता कृति ‘आधा शिर उचालेर’ माथि पोखरामा शनिबार परिचर्चा गरिएको छ ।

कविता क्लब नेपालको आयोजनामा भएको कार्यक्रममा कृतिको चर्चा गर्दै नेपाली लेखक संघ, गण्डकी अध्यक्ष डा. ईश्वरमणि अधिकारीले ज्योतिले कवितामा जीवन र जगत् लेखेकी बताए । नारी जीवनका उतारचढावको कलात्मक चित्रण कृतिमा गरिएको बताउँदै डा. अधिकारीले समाजले नारीप्रति गरेको नकारात्मक व्यवहारप्रति शालीन विद्रोह कविताले गरेको भनाइ राखे । ‘सरलता, सघनता र त्यसमा मिसिएर आउने भावनाको तीव्रता, शैली र शील्पगत मौलिकता र अनुभूतिजन्य गहनता उनका कविताका प्राप्ति हुन्,’ अधिकारीले भने, ‘आधा शिर उचालेर राम्रो कविता सञ्चयन हो ।’

अर्का समीक्षक ¥याण्डम रिडर्स सोसाइटी सदस्य नेपालप्रकाश अधिकारीले ‘आधा शिर उचालेर’ कृति कविताको सुन्दर घर भएको धारणा राखे । कविताको घरमा भएका अनेकौं झ्याल, ढोकाहरूबाट फरक फरक दृश्य देख्न सकिने भन्दै अधिकारीले त्यही घर बनाउन कुर्बानी गरेका कैयौं दिदीबहिनी, भाउजू र आमाहरूको जीवनमा आएका अवरोधप्रति विद्रोहको प्रस्तुति कवितामा आएको बताए ।

कविता क्लबका संस्थापक अध्यक्ष कवि रमेश श्रेष्ठले कवितालाई कविले जीवनलाई जत्तिकै माया गर्नुपर्नेमा जोड दिए ।

कवि ज्योति जंगलले कवितालाई समाजसँग जोडेर लेख्ने प्रयास गरेको अनुभव सुनाइन् । उनले कवितालाई सस्तो सामान बन्नबाट जोगाउन आफू प्रयत्नशील रहेको भन्दै समाजमा सबै वर्गका मानिसलाई पूरा शिर उचालेर बाँच्ने परिस्थितिको सिर्जना होस् भन्ने चाहना कवितामा प्रस्तुत गरेको बताइन् ।

विराटनगरकी कवि जंगलको यसअघि ‘पहाडको मन’ र ‘मुक्त समय’ गरी २ कविता संग्रह, ‘अक्षरमा तिमी’ गजल संग्रह तथा ‘छाया’ कथा संग्रह प्रकाशित छन् । सांग्रिला बुक्सद्वारा प्रकाशित कृतिमा ४३ ओटा कविता संग्रहित छन् । कविता क्लबका संस्थापक अध्यक्ष रमेश श्रेष्ठको अध्यक्षतामा भएको कार्यक्रमको सञ्चालन साहित्यकार रुपिन्द्र प्रभावीले गरेका थिए ।

Related News

सम्बन्धित समाचार

hero news full width